Israel diz qu'al neñu símbolu de la Intifada nun lu mataron los sos militares

XERUSALÉN, 20 de Mayu (Reuters/EP)

Israel esixó a la televisión France 2 que corrixa la información que dio sobre la muerte de Mohammed al Dura, neñu que tornó en símbolu de la Intifada del añu 2000, porque un informe gubernamental consideró que nun finó a manes de les fuerces hebrees.

A Al Dura, que daquella tenía 12 años, y al so padre, Jamal, grabáronlos cuando taben arrequexaos contra una paré metanes la ofensiva israelín sobre la Franxa de Gaza del añu 2000. La so imaxe dio la vuelta al mundu y tornó en símbolu de la Intifada.

France 2 informó de qu'Al Dura morriera y de qu'el so padre resultó firíu por causa de los disparos israelinos, lo que provocó la ira del mundu árabe. Entós, Tel Aviv esculpóse, tornando al neñu nun mártir de la causa palestina.

El primer ministru israelín, Benjamin Netanyahu, ordenó una investigación que sacó en conclusión qu'Al Dura nun morrió a manes de les fuerces israelines y atribuyó a les milicies palestines el fallecimientu del neñu.

"Nun hai evidencia que los militares israelinos fueren de nenguna forma responsables de cualquier de les firíes causaes al neñu y al so padre", reza l'informe gubernamental, que se basa na revisión de les imaxes.

En concreto, les autoridaes hebrees apuntaron que "la revisión de les imaxes muestra que ye altamente dudoso que los furacos de bala qu'hai sobre los dos los causaren dende posiciones israelines".

L'informe gubernamental hata cuestiona qu'Al Dura y el so padre resultaren firíos nel momentu en que se grabaron imaxes. "Hai numberosos nicios de que nengún de los dos recibió disparos", añadió.

Israel consideró que les acusaciones realizaes por France 2 contra les sos tropes fueron "destructives", dao que mientres años "valieron d'inspiración y xustificación pal terrorismu y l'antisemitismu".

Por ello, el país hebréu consideró que "tovía hai necesidá de publicar correctamente y esclarar la información dada por France 2, como primer pasu pa moderar los efectos destructivos de la mesma".

En respuesta, France 2 recalcó la so voluntá de "participar en cualquier investigación independiente llevada a cabu conforme a estándares internacionales", y anunció que ta dispuesta a desaterrar a Al Dura pa "esclarar les circunstancies de la so muerte".

El padre d'Al Dura, pela so parte, consideró que l'informe israelín ye una "nueva fabricación", y esixó una investigación internacional con participación árabe, según dixo a Reuters nuna entrevista telefónica dende la Franxa de Gaza.