Israel refuga'l llamáu de la ONU pa permitir la entrada d'ayuda humanitaria na Franxa de Gaza

UVIÉU, 19 de Payares (EUROPA PRESS)

El ministru israelí de Defensa, Ehud Barak, refugó güei'l llamáu realizáu pol secretariu xeneral de la ONU, Ban Ki Moon, pa que llevante'l bloquéu na Franxa de Gaza que torga la entrada d'ayuda humanitaria dende hai dos selmanes.

En declaraciones a la radio del Exércitu, Barak aseguró taxante qu'Israel nun tien intención de reabrir los pasos fronterizos. "Necesítase qu'haya calma pa que los pasos seyan abiertos", afirmó.

Ban llamó ayeri per teléfonu al primer ministru en funciones, Ehud Olmert, pa "pidi-y enérxicamente que falicite'l llibre movimientu de los suministros humanitarios que se necesiten urxentemente" y de los trabayadores de Naciones Uníes na Franxa de Gaza, según esplicó la oficina de prensa de la ONU.

Israel peslló los pasos fronterizos dempués de que milicianos palestinos respondieren con llanzamientos de cohetes a una incursión del Exércitu hebréu'l pasáu 4 de payares nel territoriu controláu por Hamas dempués de cinco meses d'altu'l fueu.

Barak reconoció güei que la violencia de les últimes selmanes desencadenóse pola incursión israelí en Gaza, na que les tropes destruyeron un túnel escaváu xunto a la frontera, supuestamente construyíu por milicianos, y que pudieren utilizalu pa secuestrar soldaos israelís.

Más d'una decena de combatientes palestios morrieron nes útlimes dos selmanes, mientres que dellos israelís resultaron firíos polos llanzamientos de los cohetes.

Tanto Naciones Uníes como les organizaciones humanitaries espresaron la so preocuación pol bloquéu al qu'Israel tien sometida a la Franxa de Gaza, onde aproximadamente la metá de la so población --d'un millón y mediu d'habitantes-- dependen de les ayudes. Si la situación nun cambia, el territoriu pue entrar nuna grave crisis alimentaria.

"Israel ye sensible a les necesidaes humanitaries. Pero tamién Hamas tien d'imponer l'altu'l furu a los grupos pequeños, y esto va ayudar a recibir más víveres al traviés de los pasos fronterizos. Si la otra parte elixe volver al altu'l fueu, va haber altu'l fueu", aseguró Barak.