IU algama un "principiu d'acuerdu" pa entrar nun gobiernu de coalición col PSOE

Marta Pulgar ocupará l'escañu d'Iglesias na Xunta Xeneral

UVIÉU, 24 de Mayu (EUROPA PRESS)

IU d'Asturies algamó un "principiu d'acuerdu" pa formar parte d'un gobiernu de coalición, encabezáu pol socialista Javier Fernández, presidente electu del Principáu dende esti miércoles.

Fontes d'IU consultaes por Europa Press, precisaron que la comisión negociadora cumple asina col mandatu del Conseyu Políticu al diseñar un documentu que va tener qu'aprobar la militancia nuna consulta que se desarrolla esti xueves en dellos puntos d'Asturies.

En concreto, van celebrase asamblees nes 22 poblaciones nes qu'IU tien sede física, mientres que nel restu, más pequeñes, va pulsase la opinión de los militantes d'IU de la forma en que se determine. La consulta y posterior recuentu podría prollongase hasta pasaes les 22 hores.

De la mesma, y como parte del acuerdu, el Conseyu Políticu d'IU ratificó esta selmana la propuesta de que Jesús Iglesias, hasta la fecha coordinador xeneral del partíu n'Asturies, ocupe'l cargu de senador de llibre designación que, d'acuerdu a los resultaos electorales, correspuende al PSOE.

La posible marcha d'Iglesias -primer senador d'IU d'Asturies- a la Cámara Alta va dar pasu a la entrada como quinta diputada na Xunta Xeneral a Marta Pulgar, númberu 6 na llista pola circunscripción central. Pulgar ye llicenciada en derechu, foi ex xerente del organismu Vipasa y conceyala nel Conceyu de Siero.

Los términos de la negociación cola FSA van esplicalos esti xueves el mesmu coordinador xeneral d'IU d'Asturies nuna rueda prensa que va ofrecer a les 11.15 hores na sede del partíu n'Uviéu.