IU pide a la militancia qu'apoye la entrada nel Executivu del PSOE pa "gobernar" y "condicionar"

UVIÉU, 24 de Mayu (EUROPA PRESS)

El coordinador xeneral d'IU d'Asturies, Jesús Iglesias, pidió esti xueves a los sos militantes qu'apoyen la entrada nun Gobiernu de coalición col PSOE, que-yos permita dar "estabilidá" y "condicionar" les polítiques del Executivu.

"Nun tengo tan claro que permanecer fuera preserve electoralmente. Tuvimos en dos gobiernos (2003-2007 y 2008-2011) y salimos bien paraos. Espero que seyamos a llograr eso y los electores mos lo premien", xustificó.

Nuna rueda prensa ofrecida na sede del partíu, n'Uviéu, xunto al diputáu Ángel González, Iglesias confesó que se trata d'una "decisión venturera" en "tiempos duros", pese a que contó que "la crisis ye la hora de los valientes". "Nun podemos mirar namás al nuesu embeligu cuando hai tantes coses en xuegu", insistió.

El coordinador de la formación destacó amás qu'IU va ocupar les Conseyeríes d'Agroganadería y Recursos Autóctonos, qu'eleva les sos competencies no relativo a espacios naturales protexíos. Va responsabilizase coles mesmes del área de Bienestar Social, onde esta lexislatura inclúise Mocedá, y de la Dirección Xeneral de Patrimoniu, dependiente de la Conseyería de Facienda, y que-y conferirá la capacidá d'acceder a la información económica y financiera de la comunidá.

Iglesias, que va abandonar previsiblemente el so cargu nun mes pa tornar en senador, aseguró que, pendiente de lo que sentencien les bases, el Conseyu Políticu va decidir esti vienres qué persones van ocupar los puestos del Conseyu Políticu d'un gobiernu que toma posesión esti sábadu.

El tovía diputáu y voceru de la coalición esplicó que nel momentu de les negociaciones, qu'acabaron la pasada madrugada, IU encamentó al PSOE poner en marcha planes autonómicos d'empléu, promover cambios na llei de prórroga presupuestaria, a poner en marcha centros residenciales, a recuperar les ayudes a la vivienda y a crear estratexes dirixíes al mundu rural.

En resume, aseguró que la so acción va dirixise a revisar la estratexa d'axuste "puru y duru" impuestu por Alemaña, en favor d'un nuevu escenariu caracterizáu poles polítiques de dinamización y la flexibilización de los oxetivos de déficit.

Asina, por exemplu, el programa de Gobiernu d'IU inclúi cuestiones, como la publicación permanente de los contratos menores, alternatives que garanticen una atención sanitaria universal, la participación del Gobiernu d'Asturies nel diseñu de la rede d'escueles de 0 a 3 años, y la prioridá de la enseñanza pública frente a la subida de los conciertos.

La coalición va velar tamién por asegurar una mayoría pública na xestión del Centru Niemeyer, n'Avilés; por consolidar la RTPA con criterios d'eficacia, pero sin privatización; pola axilización de los espedientes del salariu social y la dependencia; pol apoyu al sector ganaderu y pol caltenimientu de les inversiones en política forestal.

RESIDUOS, LLINGUA Y CARBÓN

Iglesias reconoció que cola so entrada nel Executivu'l PSOE tendrá qu'asumir amás discrepancies no relativo a la xestión de los residuos, onde IU cree que la macroincineradora "nun va facese", asina como na reconocencia de la especialidá de la 'llingua', onde confió en que'l Gobiernu dea pasos positivos que permitan "romper el maleficiu" pol que l'asturianu tornó nun elementu de confrontación, en llugar de nún de cohesión y vertebración.

L'acuerdu soscritu col PSOE inclúi coles mesmes una resolución específica de defensa de la minería, na que la coalición pide al Gobiernu central que cumpla coles responsabilidaes asumíes nel Plan del Carbón y coles sos obligaciones coles comarques mineres, too ello pa garantizar la viabilidá del sector más allá del marcu actual del 2018.