IX esixe al Gobiernu qu'unvie "lo más ceo posible" la 'Llei trans' a la Xunta Xeneral

Lgtb
TWITTER - Archivo
Publicado 13/03/2018 18:12:57CET

UVIÉU, 13 Mar. (EUROPA PRESS) -

IX esixe al Gobiernu de Javier Fernández qu'unvie "lo más ceo posible" la 'llei trans' a la Xunta Xeneral. El Secretariu d'Ellaboración, Programa y Participación, Javier Suárez Llana, afirmó al traviés d'una nota de prensa en que "depués de más de dos años de trabayu y con un testu consensuáu cola organización XEGA, nun entiende que'l Proyectu de Llei Trans nun llegara tovía a la Xunta Xeneral. "Esiximos al Gobiernu que rexistre'l proyectu lo más ceo posible", dixo.

Pa Suárez Llana, "la situación de les persones trans n'Asturies ye insostenible dende hai años, cuantimás la de los menores". Añade que les "meyores" en materia de reconocencia de derechos que se producieron n'otres comunidaes autónomes como Andalucía, País Vascu, Navarra, Canaries o Madrid nun llegaron a Asturies y tienen que facelo enantes de qu'acabe la llexislatura, alvierte'l Secretariu d'Ellaboración.

"Lo contrario va responder única y puramente a la falta de voluntá política del Gobiernu socialista. L'aprobación de la Llei Trans ye una prioridá de llexislatura pa Izquierda Xunida", diz Suárez Llana.

IX fai tamién un llamamientu a participar de manera activa na movilización entamada por XEGA el sábadu próximu 17 de marzu en Xixón con motivu del Día Internacional de la Visibilidá Trans. La concentración va celebrase a les 19.30 hores na Plaza Mayor.