UVIÉU, 2 de Marzu (EUROPA PRESS)
El númberu de productores de la Indicación Xeográfia Protexida Faba Asturiana inscritos na collecha 2013-2014 foi'l más baxu dende la creación d'esta denominación, con un total de 151, de los que 122 certificaron actividá. Sicasí, el númberu de quilos envasaos y contraetiquetes meyoró los datos d'años anteriores nos siete primeros meses de la campaña.
Son los númberos que manexa'l Conseyu Regulador de la IXP, al respective d'una campaña que tovía nun ta contabilizada na so totalidá.
El númberu de productores baxó en comparanza cola temporada anterior, que foi de 175 inscritos y 127 con actividá. Dambos parámetros son los más baxos del rexistru d'actividá, qu'empieza na campaña 1993-1994. La IXP inscribióse oficialmente nel rexistru en xunu de 1996.
Sicasí, los datos de quilos envasaos al respective de la collecha 2013-2014 son, polo menos mientres los primeros siete meses, superiores a anteriores campañes. Asina, los últimos númberos recoyíos falen de 27.366 quilos y 64.915 contraetiquetes. Nel mesmu periodu (de setiembre a marzu), na collecha 2012-2013 fueron 24.674 quilos y 48.383 etiquetes, mientres que na temporada 2011-2012 fueron 24.016 quilos y 55.560 etiquetes.
