Jacobo Cosmen (ALSA) dimite del comité de la FADE y Manuel Parrondo de la xunta directiva

UVIÉU, 11 de Xunu (EUROPA PRESS)

El presidente d'ALSA Asturies, Jacobo Cosmen, presentó la so dimisión como miembru del comité de la Federación Asturiana d'Empresarios (FADE), mientres que'l director territorial d'ALSA, Manuel Parrondo fizo lo propio no relativo al so puestu na xunta directiva, según confirmaron a Europa Press fontes cercanes a los empresarios.

D'esta manera prosigue la pinga de dimisiones y ceses nel senu de la organización empresarial asturiana, dempués de la crisis abierta na organización pola situación del so presidente, Severino García Vigón. El so puestu púnxose en cuestión dempués de que se conociera que tenía deudes con Facienda nuna de les sos empreses.

La Xunta Directiva celebrada la selmana pasada en sede de la Cámara de Comerciu d'Uviéu, na que 62 asistentes apoyaron la permanencia de Vigón frente a 36 que votaron en contra, nun paez resolver el problema.

Esi mesmu día presentó la so dimisión ún de los miembros del Comité Executivu, Ángel Antonio del Valle, presidente de Duro Felguera. Darréu, el mesmu Vigón decidía cesar de los sos cargos nel comité a Nicanor Fernández, director de la Fundación Hidrocantábrico, a Fernando Rodríguez Valledor, de Coprosa, y a Manuel García Arenas, de García Rodríguez Hermanos. Toos contrarios a la so continuidá.

Tres el fin de selmana, nel que Vigón dixo nuna entrevista al diariu 'El Comercio' que se sentía apoyáu dafechu, el presidente de la patronal del tresporte d'Asturies (Asetra), Ovidio de La Roza, anunciaba la so dimisión como miembru del comité executivu y tesoreru de la Federación. Dende FADE dixeron, sicasí, que lu cesaron.

Tamién esti llunes el vicepresidente primeru de la Federación Asturiana d'Empresarios, FADE, Ignacio Núñez, arrenunciaba al so cargu. Agora únense al capítulu de dimisiones los empresarios de ALSA. Severino García Vigón lleva dieciocho años al mandu de la patronal asturiana