UVIÉU, 22 de Febreru (EUROPA PRESS)
Javier Cayado Valdés, filólogu y poeta, pendiente nestos momentos de publicar la so primer recopilación de poesíes, foi'l ganador del concursu de relatos cortos 'Declara'l to amor pola llingua', convocáu pola Xunta Moza y la Xunta pola Defensa de la Llingua Asturiana.
Según informó la organización nuna nota prensa, na madrugada del vienres al sábado pasáu, nun actu cultural organizáu nel chigre de la Xunta Pola Defensa de la Llingua Asturiana (XPDLA), 'La Casa Posafuelles', diose a conocer el ganador del concursu. D'ente los cerca de 100 testos presentaos, y después de la escoyeta del xuráu de los diez meyores, el ganador escoyíu polos veceros y veceres que pasaron pel chigre a lo llargo de tola selmana foi pa'l nomatu Sogallardi, que correspuende a Javier Cayado Valdés.
Tanto la obra ganadora, como les otres nueve finalistes puen lleese na páxina web de la Xunta. El colectivu fai una valoración positiva en cuantes a la participación nel concursu, dao que "mediu centenar de persones quixeron dexar la so declaración d'amor pola llingua y hubo xente que participó con más d'una creación". La Xunta mostró'l so agradecimientu "a toles persones qu'apoyaron y participaron nesti concursu, amás de nel actu cultural en La Casa Posafuelles".
