UVIÉU, 1 Sep. (EUROPA PRESS) -
El presidente del Principáu d'Asturies, el socialista Javier Fernández, espresó esti miércoles les sos duldes sobre la continuidá nel tiempu de la recuperación económica. "Entramos agora nuna fase na qu'unu dulda de qu'esa recuperación seya sostenible", manifestó.
Fernández pronuncióse nesos términos nuna entrevista concedida a la Cadena Ser y recoyida por Europa Press. En dexando claro qu'esisten datos sobre la recuperación mentada, conseñó que la so máxima esmolición sigue siendo l'empléu.
Les sos duldes sobre la continuidá d'esa recuperación sofítense en que les esportaciones "prácticamente tán paraes" y nos últimos meses "fueron inclusive a menos". Amás, consideró que'l consumu internu "ye entá bien endébile".
"La mio esmolición más inmediata ye que, en llugar de consolidase la recuperación, asoceda tolo contrario", alvirtió. Argumentó que va ser difícil que les esportaciones se recuperen, na midida na qu'hai "prácticamente deflación" y un tipu de cambéu del euru "bien alto" que torga vender fora de l'área d'Europa. Asina, dixo que'l presidente del Gobiernu, Mariano Rajoy, tendría que pidir a la canciller d'Alemaña, Angela Merkel, nel so paséu pel Camín de Santiago, que "aceptara una mayor inflación y un tipu de cambéu menor".
