Javier Fernández y Pere Navarro coinciden na necesidá de reformar la Constitución "en sen federal"

UVIÉU, 11 de Xunu (EUROPA PRESS)

El presidente d'Asturies y coordinador del Comité Territorial del PSOE, Javier Fernández y el primer secretariu del Partíu Socialista Catalán (PSC), Pere Navarro, coincidieron esti martes na necesidá de reformar la Constitución de 1978 "nun sentíu federal".

Dambos comprometiéronse a siguir calteniendo contactos, ente ellos y col conxuntu de la organización, hasta'l día 6 xunetu cola cuenta d'algamar un acuerdu del conxuntu del socialismu español con cuenta de tatar la necesaria reforma de la Constitución.

Fernández y Navarro caltuvieron esti martes una xunta na sede de los socialistes asturianos que s'enmarca na ronda de contactos que los distintos líderes territoriales del PSOE tán calteniendo de cara a la preparación de la xunta del Conseyu Territorial que ta prevista pal próximu 6 de xunetu. Nengún d'ellos fizo declaraciones a los medios tres l'alcuentro, y llendáronse a emitir una nota de prensa.

Na xunta, que duró dos hores y media, tratáronse temes como la situación de crisis económica, les necesaries polítiques d'empléu, la preocupación poles polítiques de recortes de derechos de los gobiernos conservadores, l'alternativa al modelu d'austeridá impuestu polos conservadores europeos, el modelu territorial español, la modernización de les instituciones, la participación ciudadana, la financiación autonómica y, a última hora, la necesaria meyora hacia la España del sieglu XXI.