Javier Fernández pide una financiación autonómica solidaria y refuga un conciertu ente'l Gobiernu y Cataluña

Javier Fernández
ARMANDO ÁLVAREZ
Actualizado: martes, 21 noviembre 2017 15:59

El presidente asturianu aboga por aprobar la Llei del Cupu Vascu dientro d'unos meses cuando se negocie'l sistema de financiación autonómica

UVIÉU, 21 Nov. (EUROPA PRESS) -

El presidente del Principáu d'Asturies, el socialista Javier Fernández, reclamó esti martes una financiación autonómica que sía solidaria, refugando "l'apañu económicu" que supondría estender el modelu de conciertu pa Cataluña.

Mentes un almuerzu informativu, el rexidor autonómicu mostró la so esmolición por que'l cambiu nel modelu de financiación pa Cataluña "forme parte de les ufiertes de solución al conflictu catalán". "Sería inocente si nun lo considerara", señaló.

D'esta manera xustificó les sos repitíes alusiones al conflictu catalán, pol que dellos partíos reprocháron-y que "fale poco d'Asturies y enforma de Cataluña. "Vuelvo esclarialo: falo del Principáu y los sos recursos, del dineru del que vamos disponer pa hospitales, escueles y servicios sociales", puntualizó.

Nesti sentíu mostró la so negativa "atayante" a la estensión del modelu de conciertu y a un alcuerdu billateral ente la Generalitat y el Gobiernu d'España sobre les condiciones de financiación de Cataluña. "Per esi camín, el réxime común namás sería'l réxime pequeñu de les comunidaes ensin privilexos", llamentó.

Por eso, abogó pola solidaridá ente comunidaes y pola harmonización tributaria dientro d'una caxa común pa tol Estáu.

Sicasí, aludió a la "piedra de toque" que supón el nacionalismu, como la existencia oxetiva de fuercies polítiques y sociales que reclamen un tratu distintu y "más provechosu" ente les sos comunidaes y el Gobiernu central. "Agora mesmu la Constitución reconoz la singularidá foral; si esi réxime s'estiende, va haber, ensin remediu, grandes ganadores y grandes perdedores netos", alvirtió.

Nesti contestu, afirmó que nun acepta "de nenguna manera" qu'Asturies pueda formar parte del "pelotón de perdedores".

Sobre'l modelu de financiación autonómicu nuevu que tovía nun foi puestu en marcha, llamentó que la inestabilidá política derivada de les socesives elecciones xenerales n'España y la crisis catalana retrasaren la so aprobación hasta 2018.

CUPU VASCU

Sobre si ta d'alcuerdu con que s'apruebe agora'l Cupu Vascu, Fernández manifestó que'l sistema de conciertu Vascu ta nuna disposición adicional de la Constitución y "nun procede debatilo". "Lo que sí hai que debatir son los resultaos del Cupu Vascu", añade.

Esplica que'l Gobiernu Vascu, les Diputaciones, nesti casu, recauden los impuestos y dan-y al Estáu'l Cupu, esto ye, les cantidaes correspondientes a los servicios que nel País Vascu sigue exerciendo l'Estáu. "Saber si esi Cupu ye afechu o nun ye la caxa negra de la política española, naide sabe mui bién como se calcula".

"Nesi cupu nun va incluida nenguna participación nos mecanismos de solidaridá del sistema de financiación común. Cuando se fixo la Constitución y determinóse'l sistema de conciertu nel País Vascu, les Comunidaes Autónomes nun existíen, nin existía'l sistema de financiación. Y esti sistema tien unos mecanismos de solidaridá pero eso nun lo fai'l sistema del cupu vascu", sostién.

"Convendría que nel sitiu d'aprobar agora la llei de cupu pa cinco años aprobárase dientro d'unos meses cuando se tea negociando tamién el sistema de financiación autonómica que tamién sería pa otros cinco años y d'esa manera veríamos la fórmula, de que dende'l Cupu tresfiriérense, porque ye obligao facelo, porque'l País Vascu ta bien sobrefinanciáu, recursos a les CCAA del sistema de financiación de servicios públicos esenciales", añade.

Asturianu ofrecido por