Jordi Pujol "llamenta" que Felipe González se metiera nel asuntu de la financiación

L'ex presidente catalán considera que nun ye normal xustificar el retrasu de la reforma de la financiación pola crisis económica

UVIÉU, 12 de Mayu (EUROPA PRESS)

L'ex presidene de la Generalitat de Cataluña, Jordi Pujol, llamentó güei que l'ex presidente del Gobiernu. Felipe González, se manifestara a favor de dexar la reforma de la financiación pa momentos de mayor bondá económica. "Llamentamos que se metiera nesti tema y en Cataluña entendemos que foi una invertención desgraciada", dixo Pujol, qu'añadió que-y consta qu'él sabe que la financiación de Cataluña ye mui inxusta".

"Pudo non selo igual hai 20 años, pero güei la financiación de Cataluña ye mui inxusta", dixo Jordi Pujol en declaraciones a Europa Press. L'ex presidente catalán visitó güei'l Principáu pa presentar nel certame LibrOviedo les sos memories.

Enantes de dir al certame lliterariu, Pujol aseguró que la reforma de la financiación "hai que facela ya" y añadió que la escusa de qu'hai qu'aplazala pola crisis económica ye "anómala", por dellos motivos, el primeru porque "hai una llei que ye l'Estatutu que diz qu'hai que facelo y una lei ye una llei". El segundu motivu ye que "si hai menos dineru va repartise menos dineru ente toos, pero hai que cambiar los criterios".

"Esto nun lo digo yo sólo, lo diz el presidente de Cataluña, que ye del PSOE", añadió Pujol.

"La solidaridá equí y n'Europa va destinada a que los países superen les sos dificultaes y llegue un moemntu en que ya nun la necesiten o la necesiten menos, poro de vez en cuando hai que ver qué pasa y revisala", esplicó.

Nesti sen aseguró que-y "consta" que'l Principáu d'Asturies sigue necesitando la solidaridá del restu de comunidaes y una aportación importante, ya que sufrió crisis mui fonderes y "tovía nun ta en condiciones d'actuar ensin apoyos esternos". A eso añadió qu'a lo qu'hai qu'aspirar a qu'un día Asturies y nun necesite nada de naide.