MÁLAGA, 3 de Setiembre (EUROPA PRESS)
L'exalcalde de Marbella (Málaga) Julián Muñoz espresó esti xueves el so arrepentimientu "de corazón" polos fechos que cometiera y pidió perdón a la ciudá andaluza, "que se portó perbién conmigo". Asina lo aseguró na so declaración nel casu 'Fergocon', sobre les presuntes irregularidaes en contrataciones d'obres per parte del Conceyu marbellín nel 2001 y nel 2002. "Siéntolo muncho, pido perdón", repostió.
La Estaya Octava de l'Audiencia de Málaga acueye dende esti pasáu miércoles el xuiciu a Muñoz, al lletráu José María del Nido, que na so declaración yá almitió los fechos polos que se-y acusa y aseguró que diba devolver "hasta l'últimu euru", y a otres 10 persones más. La Sala resalvó a Muñoz d'asistir a toles sesiones del xuiciu por cuenta del so estáu de salú; ello ye que en respondiendo namás al fiscal y a la so defensa, abandonó la sala.
"Arrepiéntome fondamente y de corazón de los fechos que cometí nesta causa y n'otres causes que pudiera tener pendientes y de les que toi cumpliendo", aseguró'l que fuera rexidor, que reconoció los fechos y insistió en pidir perdón non solo a Marbella, sinón "ante'l perxuiciu que puea causar a la sociedá polo xeneral".
Indicó que pa iguar esi perxuiciu económicu causáu nun tien más patrimoniu del que yá informó y apurrió ante l'Audiencia, que ye "el capital retenío, productu d'un herencia de los mios padres", asina como un inmueble y el dineru retenío de los programes de televisión.
"Cómo puedo iguar el dañu, colo que tengo, que ye eso", precisó, añadiendo que pretende entergar tamién el dineru de la so xubilación cuando se produza y otros ingresos futuros que tenga.
Muñoz aseguró que foi "un títere al serviciu del señor Jesús Gil" y roblaba documentos "hasta nes barres de xelu", y manifestó que toos nel Conceyu siguíen les ordes d'aquél, anque fueren illegales, "dende los coordinadores hasta la primer teniente d'alcalde; otra cosa ye que depués caún fuera al so aire", faciendo'l negociu pola so cuenta. Amás, dixo que les sociedaes municipales yeren instrumentos "pa entainar procedimientu y pagar".
