MADRID, 18 de Xunetu (EUROPA PRESS)
L'axencia de seguridá ucraniana SBU fizo públiques trés conversaciones nes que participaríen supuestos miembros de la Intelixencia militar rusa y separatistes del este d'Ucrania que demostraríen que los rebeldes valtaron l'avión de Malaysia Airlines que s'estrelló'l xueves con casi 300 persones a bordu.
La primer llamada fecha pública por Kiev tendría llugar 20 minutos dempués de la cayida de l'aeronave. Nella, un supuestu dirixente separatista, Igor Bezler, informa a un dirixente de la Intelixencia rusa identificáu como Valeri Geranin del valtamientu del avión, según el periódicu 'Kyiv Post'.
Na segunda conversación, un rebelde de nomatu 'Mayor' confirma "al cien por cien" a otru separatista, 'Griegu', que se trata d'una aeronave civil. Llega a dicir que nun hai "absolutamente nada" militar ente los restos de l'aeronave y, sicasí, "fala d'instrumentos civiles, material médico, toalles, papel hixénico".
El tercer estractu fechu públicu pola SBU recueye un diálogu ente un milicianu y un comandante cosacu, Nikolai Kozitsin, nel que tamién s'intercambien primeres impresiones sobre lo asocedío. "Hai munchos cuerpos de muyeres y neños", diz el separatista, que darréu pregunta "qué taba faciendo en territoriu ucranianu" un avión de Malaysia Airlines.
"Eso significa que tresportaba espíes. Nun tendríen de tar volando. Hai una guerra", respuende Kozitsin.
L'Executivu ucranianu culpó a los separatistes de valtar l'avión con un misil tierra-aire. El presidente d'Ucrania, Petro Poroshenko, faló abiertamente "d'actu terrorista".
Pela so parte, el primer ministru de l'autoproclamada República Popular de Donetsk, Alexander Borodai, dixo que la cayida de l'aeronave debióse a una acción de la Fuerza Aéreo ucraniano.
