BARCELONA, 21 d'Agostu (EUROPA PRESS)
L'abatíu en Subirats (Barcelona) esti llunes de tarde ye Younes Abouyaaqoub, autor del atentáu de Barcelona que dexó 14 víctimes, 13 en La Rambla y una na avenida Diagonal, según informaron los Mossos.
Taba en busca y captura, y confirmóse que yera'l conductor de la furgoneta qu'arrolló a peatones de La Rambla y acabó poco dempués cola vida d'un mozu na Diagonal.
El terrorista de 22 años yera d'orixe marroquín y vivía en Ripoll (Girona), igual que bona parte de la célula qu'atentó en Barcelona y Cambrils (Tarragona) la selmana pasada.
LOS FECHOS D'ESTI LLUNES
Esti llunes de tarde descubriéronlu en Subirats y abatiéronlu mientres llevaba pegáu al cuerpu un cintu d'esplosivos, que los Tedax pudieron retira-y cuando'l cuerpu quedó boca abaxo.
Cuando los axentes lu descubrieron, Younes Abouyaaqoub endomendóse a Alá antes que lu dispararen. Los fechos asocedieron sobre les 16.30, polo que se punxo en marcha un operativu policial y activáronse dellos servicios: Tedax, Arro, Helix, Brimo, Tráficu y Usc.
Los Mossos d'Esquadra tán verificando si en Subirats (Barcelona) y zones cercanes hai una o más persones vinculaes al terrorista. Caltiénse abiertu un operativu policial, qu'inclúi un helicóperu y controles per carretera.
