González Riaño defende un modelu como'l gallegu y diz que la mayoría de los funcionarios nun van tar obligaos a saber asturianu
UVIÉU, 18 Ene. (EUROPA PRESS) -
El presidente de l'Academia de la Llingua, Xosé Antón González Riañu, denunció esti xueves de la existencia d'una campaña "d'ataque" a la oficialidá de la llingua asturiana nel Principáu. Amás, dixo que'l modelu d'oficialidá qu'ellos proponen nun supondría, a plenu rendimientu, más de 20 millones anules, un 0,35% del presupuestu asturianu, qu'amás habría que contemplar como una "inversión" porque va crear empléu y actividá económica.
González compareció nuna rueda de prensa, xunto a la vicepresidenta de l'Academia, Marta Mori, y el secretariu, Xosé Ramón Iglesias. Al actu, nel qu'enantes de contestar entrugues, lleóse un estensu comunicáu, asistieron amás representantes d'otros ámbitos como Xunta pola Defensa la Llingua Asturiana o Iniciativa pol Asturianu.
Los 20 millones mentaos, según González Riaño, allóñense enforma de la cantidá que señala'l PP, de 50 millones, dalgo que considera que faen pa "meter mieu". Amás del PP, tán en contra de la oficialidá, según l'Academia, una serie de "sectores sociales marxinales" que tienen muncha actividá en redes.
La estratexa del PP, d'oponese a la oficialidá, ye "enquivocada", según González Riaño, porque munchos de los sos votantes son partidarios de la mesma y asina-ylo reconocieron, afirmó, conceyales 'populares'. Tampoco nun considera lóxica la so posición dende un puntu de vista de réditu electoral, porque González Riaño afirma que namás un 18 por cientu de los asturianos refuguen la oficialidá.
Nesta llinia, esplicó que yá hai tiempu propunxo un conceyu al PP, en concretu a la so presidenta n'Asturies, Mercedes Fernández, pa falar d'esti asuntu. Nun recibió entá respuesta.
De la cantidá qu'habría que poner como "inversión" pa la oficialidá, amás, habría que descontar la partida económica que tendría que poner l'Estáu, como se fai n'otros territorios con llingua propia.
Esplicó qu'existen instituciones nes que va suponer "costu cero", como la Universidá d'Uviéu, "onde yá se pueden defender tesis n'asturianu". N'educación primaria, esplicó, la situación sería meyor a l'actual, yá que actualmente faen falta dos profesores, al poder escoyer ente Asturianu y Cultura asturiana.
Evitó falar de 'obligación' pa los neños a la hora d'aprender asturianu. Lo que se va a facer, esplicó ye que l'asignatura d'Asturianu pase a tar "a disposición de tolos alumnos", como "asocede coles Matemátiques". Mostróse abiertu a qu'haya esceiciones, por exemplu pa los neños que namás tean un añu n'Asturies, por motivos llaborales de los sos padres. Too esto va dir acompañáu d'un refuerciu importante de la presencia de la llingua asturiana nos medios de comunicación.
Cuando-y preguntaron sobre si l'Academia planteaba un modelu como'l vascu, González Riaño esplicó que'l so apueste ye por un sistema "amoldáu" a les necesidaes d'Asturies. Nesti sentíu, mostróse partidariu de los modelos gallegu o valencianu, nos que los alumnos "nun sienten l'asturianu como una imposición".
FUNCIONARIOS
"Ye risible y hasta grotescu que daquién pueda comentar que tolos funcionarios d'Asturies tendríen que conocer o usar l'asturianu, o que la conocencia del asturianu tuviera que ser condición necesaria pal accesu a la función pública pal personal que nun tuviera qu'actuar puramente na xestión de la oficialidá", señaló na llectura del comunicáu.
Asina, consideró que va haber un "porcentaxe mínimu" de funcionarios que tean obligaos a tener formación específica. "Va saber una parte pequena, con dalgún incentivu", esplicó al responder a entrugues de la prensa. Sí mentó que, ensin ser obligatoriu, l'asturianu va ser contempláu como "méritu".
Los que sí van tener que sabelo, por exemplu, son lod profesores qu'opten a les oposiciones pa impartir l'asignatura d'ssturianu. N'otros casos calcula que la proporción pue ser d'ún de cada siete funcionarios, l'encargáu de tramitar los escritos oficiales en llingua asturiana.
"La oficialidá ye irreversible", indicó'l presidente de l'Academia de la Llingua, que sostíen que la demanda d'esi modelu ye "llargamente mayoritaria" n'Asturies.
