L'Academia de la Llingua esclaria que'l cursu de Ponferrada organízalu una asociación lleonesa y el profesor ye lleonés

   El cursu d'astur-llionés que se ta celebrando en Ponferrada faise por pidimientu del Conseyu Comarcal d'El Bierzu, organízalu una asociación berciana, La Caleya, y el profesor que da les clases ye un filólogu lleonés que va "respetar" les variantes falaes na zona, según s'informó dende l'Academia de la Llingua Asturiana (ALLA).

   Foi la respuesta que Xosé Antón González Riaño, miembru de la entidá llingüística asturiana y persona encargada de xestionar la preparación del cursu, dio a les crítiques recibíes per parte de l'asociación berciana El Toralín, qu'acusó a l'ALLA d'espansionismu y consideró'l cursu un agresión per parte d'esta institución. Según esti colectivu, ye l'Academia de la Llingua la qu'organiza'l cursu.

   Sin embargu, Riaño esclarió que'l cursu organízalu una asociación lleonesa, La Caleya, y que foi'l Conseyu Comarcal d'El Bierzu, entidá collaboradora, la que se punxo en contauto cola ALLA. L'Academia lo único que fizo foi facilitar los materiales didácticos y el profesor, un filólogu lleonés "de confianza y que va respetar les variantes llingüístiques de la zona", esplicó l'académicu.

   De fechu una de les crítiques de l'asociación ye que'l cursu nun yera de lleonés, sinón d'asturianu. Sin embargu, los mesmos carteles que lu anuncien falen de 'Cursu de llingua-asturllionesa'. Nesti puntu, Riaño reconoció que l'Academia considera que lo que n'Asturies se llama asturianu y en Lleón se llama 'llionés' son dos variantes d'una mesma llingua, y que nesti casu, el cursu que se diba dar yera de la variante que se fala na zona lleonesa, y non na asturiana.

   "Ye únicamente un exerciciu de collaboración, de la mesma manera que si mos llamen par dar una conferencia", afirmó, p'añadir que "nin mos metemos cola política llingüística nin tomamos nenguna iniciativa".

   El representante de l'ALLA dexó claro qu'esta institución nun quier provocar nenguna polémica col lleonés y que l'Academia ye "respetuosa coles polítiques llingüístiques d'otres comunidaes autónomes, igual qu'exixe respetu pa les d'Asturies per parte d'otros territorios".