L'Academia de la Llingua muestra la so satisfaición pol autu del TC pero pide la oficialidá como garantía de derechos

UVIÉU, 09 de Marzu (EUROPA PRESS)

L'Acacemia de la Llingua Asturiana mostró güei la so "más fonda satisfaición" pol autu del Tribunal Constitucional qu'avalaba la Llei de Promoción y Usu del Asturianu, pero exixó la oficialidá de la llingua como única manera de "garantizar y homologar los derechos llingüísticos de tolos asturianos, de manera que dexemos, d'una vez yá, de ser ciudadanos de segunda nel marcu de la Constitución Española qu'a toos debería acoyer por igual".

Según señaló l'Academia nun comunicáu, "nun ye sólo que'l TC refugue la inconstitucionalidá del árticulu 4.2 de la Llei d'Usu del Asturianu, onde s'afita la validez del emplegu d'esta llingua nes comunicaciones orales o escrites de los ciudadanos col Principáu d'Asturies, sinón qu'amás 'obliga' a l'Alministración autonómica a acoyer ensin torga dala les comunicaciones que se-y apurran n'asturianu".

Entiende l'ALLA, sicasí, que "nun podemos cayer na autocomplacencia: los asturianos sufrimos una situación, dafechu peculiar nel contestu español, d'inseguridá xurídica que nun afeuta, por ciertu, a los ciudadanos gallegos, vascos, navarros, catalanes, araneses, valencianos o baleares".

"Ye llamentable" pa l'Academia que "tengan que ser persones individuales o coleutivos ciudadanos los que, de contino, esixan l'exerciciu de derechos llingüísticos qu'afiten la Constitución Española y los trataos internacionales a los qu'España se vincula".

Según la Institución, "l'Autu del TC, a la escontra de lo que dalgunos quieren facer ver, per otru llau nun implica nenguna clas d'oficialidá, desque namái afita como dafechu válidos los usos llingüísticos de los asturianos y asturianes colos muérganos dependientes del Principáu d'Asturies, acordies cola llegalidá vixente".

"Queden, d'esti mou, fuera de les llendes afitaes nel Autu del TC los usos del asturianu n'otros ámbitos tan importantes como los de los conceyos o les delegaciones de l'alministración central asitiaes n'Asturies", matizó'l comunicáu.

"Los derechos llingüísticos de los asturianos tienen enforma menos grau de reconocencia que los del restu de ciudadanos de les otres comunidaes del Estáu con llingua propia en contestos tan emblemáticos como l'educativu, el de l'alministración de xusticia, la xestión ciudadana o la vida universitaria", comentó ente otros l'Academia.

Asina pues, la carauterística básica de la situación llingüística asturiana ye, "per un llau, la inseguridá xurídica y, per otru, la corta reconocencia de derechos llingüísticos". "La realidá, a lo llargo d'estos años, muestra una vuelta y otra que namás la oficialidá pue garantizar y homologar los derechos llingüísticos de tolos asturianos de mou que dexemos, d'una vez yá, de ser ciudadanos de segunda nel marcu de la Constitución Española qu'a toos debería abellugar per igual", exixó la institución.

Acordies colo anterior, l'Academia de la Llingua Asturiana fai un llamáu "a les fuercies polítiques asitiaes na Xunta Xeneral del Principáu pa que tomen determín nesti sen, de mou que'l marcu xurídicu del asturianu algame una solución, firme y estable, d'oficialidá, adautada a les necesidaes sociollingüístiques d'Asturies; y reitera la ufierta fecha nel so momentu pa collaborar con tolos axentes sociales nel llogru del citáu marcu xurídicu", acabó la nota.