UVIÉU, 21 de Xunetu (EUROPA PRESS)
L'Academia de la Llingua Asturiana pidió-y al PP, y mui en particular a los sos principales dirixentes, que reconsideren la estratexa de crispación y falsos discutinios sobre'l plan pilotu que'l Gobiernu autonómicu ta entamando pa impartir l'asturianu como llingua vehicular en delles asignatures en dalgunos centros el próximu cursu.
El diputáu del PP na Xunta Xeneral, David González Medina, ofreció esti miércoles una rueda de prensa na que confirmaba la presentación d'un recursu del PP contra esta iniciativa.
Nesti sen, l'Academia recordó-y qu'hai "yá cuasi un mes que la Xunta de Gobiernu de l'ALLA solicitó a la Presidenta del Partíu Popular un aconceyamientu francu, pa poder falar xuiciosamente de toes estes cuestiones y de delles otres que cinquen a la cultura d'Asturies, ensin qu'hasta'l momentu hubiere rempuesta dala a tal solicitú".
L'Academia recordó que'l Plan Pilotu abre la posibilidá d'ufiertar l'asturianu como llingua vehicular pa impartir dalguna asignatura del currículu d'Educación Primaria en seis centros, siempre col preste del Claustru y de les families de los escolinos.
Criticó asín "la so perplexidá énte esta iniciativa, asina como la so esmolición pol desaxustáu facer que nesti ámbitu vienen poniendo en práutica determinaos dirixentes del principal partíu de la oposición n'Asturies".
"Pela cueta, hai que conseñar que nun son pocos los militantes y simpatizantes del PP qu'apocayá vienen tresmitiendo a la institución llingüística que nun entienden l'oxetivu d'una estratexa que nun comparten y que, a la escontra, ellos sí que tienen en cuenta el valir social y cultural de la nuesa llingua", señala l'Academia.
Al empar, a l'ALLA resúlta-y difícil entender que "daquién piense que ye rentable políticamente emplegar de contino'l despreciu y la negación de les posibilidaes de la llingua y la cultura asturiana, intentando facer d'ello un elementu de confrontación n'Asturies, mui en particular nel ámbitu educativu, na Xunta Xeneral o na vida diaria de los conceyos".
"Ello ye más llamadero tovía si tenemos en cuenta los últimos datos ofrecíos pol III Estudiu Sociollingüísticu d'Asturies, del que se fixo públicu un *Avance* hai unos díes, pero que quiciabes los dirixentes del PP d'Asturies nun tienen interés en conocer", señala l'Academia. "Los datos d'esti estudiu, n'efeutu, amuesen por exemplu que la mayor parte de los asturianos taríen d'acuerdu n'afitar la presencia escolar del asturianu (incluyendo la posibilidá del so usu vehicular al llau del castellán), la so presencia nos contestos institucionales y, mesmamente, na oficialidá de la llingua histórica d'Asturies", recordó la Institución.
