UVIÉU, 17 de Xunetu (EUROPA PRESS)
L'Academia de la Llingua Asturiana va dirixise al presidente del Gobiernu, José Luis Rodríguez Zapatero, y al presidente del Partíu Popular y cabezaleru de la oposición, Mariano Rajoy, pa informar de la situación actual de la llingua asturiana, de la reforma del Estatutu d'Autonomía, y de la posición d'esta institución al respeuto.
Asina lo anunció Cano al finar un actu simbólicu en favor de la oficialidá y en protesta pola redaición del artículu cuartu del Estatutu d'Autonomía que la selmana pasada acordaron PP y PSOE, y que reconoz la llingua como un patrimoniu, ensin declarala oficial.
Cano esplicó que l'Academia va dirixise a dambos representantes, anque nun matizó al traviés de qué mediu. Trátase d'una aición destinada a, principalmente, a contraponer la postura d'estos dos partíos n'Asturies sobre la oficialidá de les llingües autonómiques col restu de comunidaes onde hai llingües oficiales (Galicia, País Vascu, Cataluña, Comunidá Valenciana y Isles Baleares).
CALTENER LA REIVINDICACIÓN.
Per otra parte, los partidarios de la oficialidá de la llingua asturiana llamaron güei al "caltenimientu de la llucha" por esta midida, hasta'l final del procesu de reforma del Estatutu d'autonomía.
Foi una conseña común llanzada pola presidenta de l'Academia, y apoyada por una ventena de representantes de colectivos sociales y culturales qu'intervinieron nel actu, convocáu pola ALLA.
Cientos de persones fueron a ún de los salones nel Auditoriu d'Uviéu, p'asistir a la intervenicón de Cano y del restu de persones que, una tres d'otra fueron tomando la pallabra.
Tres la llectura del comunicáu fechu públicu la selmana pasada pola Academia de la Llingua, responsabilizando a PP y PSOE del procesu de desapaición del idioma, Cano entrugó "de qué valió" tol trabayu desarrolláu nos últimos 30 años pola ALLA, en materia d'estudiu y espardimientu de la llingua al traviés de llitros, folletos y demás materiales. Tamién entrugó de qué valieron les clases que s'ufierten n'asturianu y a les que "asisten nesti momentu 20.000 escolinos voluntariamente", pa qué "tanta música n'asturianu qu'escuchen miles de persones".
Llamó poro a siguir exixendo la oficialidá. "Nun-yos va ser fácil valtar el sentimientu del pueblu asturianu", afirmó. "L'Academia nun va permitir que l'asturianu desapaeza, y pa ello va tar apoyada por un ampliu texíu social, organizáu de manera coordinada", añadió.
Fizo tamién un "llamáu a la esperanza" y pidió, per última vez, a PP y PSOE, que "corrixan esti estatutu que naz muertu, porque tovía tán a tiempu". Asina, recordó la propuesta de l'Academia, basada en tres puntos: la declaración d'oficialidá, la llei que la va desarrollar y l'acuerdu parlamentariu sobre'l presupuestu que va dedicase.
El caltenimientu de la "llucha", espresáu pol representante de la Xunta pola Defensa de la Llingua, foi apoyáu pol restu d'intervinientes. Ente ellos figuraron miembros del Colectivu de Periodistes pol Asturianu, del Conceyu Abiertu pola Oficialidá, de la Fundación Belenos, de la Fundación Caveda y Nava, del Colectivu d'Escritores pol Asturianu, representantes sindicales como Beatriz Quirós (Suatea) y representantes del mundu del arte y la cultura, como'l vocalista del dúu Nuberu, Chus Pedro, o l'humorista gráficu Neto.
Asina, Juan Mariño, direutor de la cadena Radio Sele, llamó a participar nos actos que se convoquen de magar agora y hasta que se confirme la nueva redaición del estatutu. L'escritor Pablo Rodríguez señaló la importancia d'utilizar l'asturianu na lliteratura pa espresar meyor les idees y sentimientos del autor. Pela so parte, Beatriz Quirós recordó'l trabayu de la Xunta de Personal Docente Non Universitariu por caltener y da-y punxu a les enseñances d'asturianu na educación primaria y secundaria.