UVIÉU, 10 Oct. (EUROPA PRESS) -
El presidente de l'Academia de la Llingua Asturiana, Xosé Antón González Riaño, afirma que mentes Antonio Virgili sía director de RTPA, "la llingua asturiana nun tendrá espacios de dignificación al traviés del so usu normal n'espacios informativos". Por eso, la institución llingüística pide la so dimisión "inmediata" y va treslladar esta petición a los grupos parllamentarios.
Al traviés d'una nota de prensa, Riaño señala que lleven años calteniendo concersaciones con Virgili pa plantear midíes de visualización y normalización de la llingua asturiana na RTPA. "El resultáu d'estes conversaciones siempre foi frustante, porque siempre aparecía dalgún problema", apunta.
Pa tratar d'iguar "definitivamente" la situación del asturianu nos espacios informativos, l'Academia aconceyó'l 17 de xunetu pasáu col director de la RTPA y presentaron un propuesta pa entamar un espaciu informativu diariu n'asturianu.
Na propuesta recoyíase qu'ún de los dos espacios informativos de la canal fora n'asturianu y que la esperiencia principiaría en mayu del 2018, coincidiendo cola Selmana de les Lletres. Mentando, la institución encargaríase de diseñar un plan de formación pal personal de la RTPA que llibremente quixere participar nél y a llevalu alantre nes propies instalaciones de la RTPA y ensin coste económicu pa la cadena pública.
Según l'Academia, la respuesta de Virgili llegó meses depués, en setiembre, al traviés d'un corréu electrónicu de la so secretaria. Una comunicación que "podríemos calificar mui duramente, dízsenos que'l compromisu de la RTPA cola dignificación y normalización de la llingua asturiana muéstrase al traviés de de programes como, ente otros, 'Asturianaes', 'De folixa en folixa', 'Guía Chigrín' o la retresmisión n'asturianu de la 'Misa dende la Cueva San Pedrín'", señalen dende la institución.
"Dende l'Academia tamos falando d'otra cosa; de les posibilidaes de dignificar la llingua asturiana empleándola como llingua normal de comunicación nos espacios informativos. Dende esti puntu de vista, la respuesta pareznos una burlla a les espectatives y demandes de la sociedá asturiana", afirma Riaño.
Pal presidente de la institución llingüística, la respuesta adoptó un "tonu impertinente" porque Virgili aseguró qu'emitir un informativu n'asturianu yera un pasu "inasumible" porque incumplía l'Estatutu d'Autonomía al nun recoyer la oficialidá.
"Dende l'Academia entendemos el mensaxe y esti ye inequívocu: mentanto'l señor Virgili sía director de la RTPA, la llingua asturiana nun tendrá espacios de dignificación al traviés del so usu normal n'espacios informativos", apunta Riaño, que tamién señala qu'esto muestra que Virgili nun ye la "persona indicada" pa dirixir la televisión pública asturiana.
"Nun ye posible que la so actuación condicione la normalización llingüística y l'esfuerciu de munches persones enfotaes na recuperación del asturianu. Quiciabes el so papel y determín encaxe na empresa privada pero, de nengún mou, nuna televisión con vocación pública y asturiana", sentenció Riaño.
Por eso, l'Academia pide la "dimisión inmediata" d'Antonio Virgili y anuncia que va treslladar esta petición a la opinión pública asturiana, a los estremaos axentes sociales y a los grupos parllamentarios allugaos na Xunta Xeneral.
