UVIÉU, 22 Mar. (EUROPA PRESS) -
El presidente de l'Academia de la Llingua Asturiana, Xosé Antón González Riaño, va intentar que la líder del PP, Mercedes Fernández, acuda al Campoamor el 4 de mayu próximu, Día de les Lletres Asturianes, "porque ye mui importante que'l so partíu se sume al consensu constitucional".
L'Academia de la Llingua Asturiana va celebrar el 4 de mayu próximu, a les 20.30 hores nel Teatru Campoamor, la so Xunta Estaordinaria, que ye l'actu principal del Día de les Lletres Asturianes y onde Xosé Antón González Riaño va lleer el so primer discursu como presidente de la institución depués d'asoceder nel cargu a Ana Cano.
Un discursu onde'l tema de la oficialidá "va tar presente", indicó Riaño, que dixo que nél va argumentar la necesidá de "solucionar" esti "problema cultural", porque tamos nuna época "na que se dan les condiciones pa ello". "Nun sé si se pue falar d'añu o d'época, pero tamos nel momentu", dixo.
Nesi sentíu, anunció que va facer un "esfuerciu mui grande" pa que nel Campoamor haya "la mayor y meyor representación a nivel políticu". "Tolos grupos parllamentarios tienen que tar representaos", afirmó Riaño, que dixo que diba facer un esfuerciu "personal" col PP, que nos últimos tiempos tien una posición afitada contra la oficialidá de la llingua asturiana, un marcu llegal que l'Academia vien reivindicando dende hai décades.
Asina, afirmó que'l PP participó n'otres ocasiones nel Día de les Lletres y que nesta ocasión va "intentar" qu'acuda al Campoamor la líder de los 'populares' asturianos, Mercedes Fernández, "insistiéndo-y nos planteamientos de l'Academia que busquen el consensu sobre la oficialidá".
Una oficialidá que, según Riaño, ye un "mandáu constitucional". "Sería mui importante que'l PP se sumara a esi consensu, porque hai argumentos económicos y sociolóxicos y yá podemos falar del modelu d'oficialidá qu'Asturies necesita", argumentó'l presidente de l'Academia, que recordó tolos trabayos que tien publicaos la institución nestos años.
Riaño tamién fixo referencia a "tol trabayu fechu" pola Universidá d'Uviéu con unos estudios de filoloxía asturiana "homologables". "Nun tengo nengún reproche que-y facer a la Universidá, anque hai coses que meyorar", dixo Riaño, que recordó que tovía hai problemes pa defender los Trabayos Fin de Grau y Fin de Máster n'asturianu.
Otra manera, el presidente de l'Academia informó que la presentación del actu del Día de les Lletres fíxose tan ceo --mes y mediu enantes de la so celebración-- porque d'equí al 4 de mayu "tovía pue haber novedaes" y ye posible que se dean a conocer "otres iniciatives culturales".
