MADRID, 17 Ene. (EUROPA PRESS) -
Un tribunal militar israelín prorrogó esti miércoles pela cuarta vez la detención provisional de l'adolescente palestina Ahed Tamimi, detenida depués de cutir a dellos soldaos mentes una protesta en Cixordania'l pasáu 15 d'avientu, polo que va siguir ente rexes polo menos hasta'l xuiciu.
El padre de la moza, Bassem Tamimi, confirmó a l'axencia de noticies Wafa que'l tribunal prorrogó la prisión pa la so fía y la so muyer, Nariman Tamimi. La primera d'elles va volver comparecer el 31 de xineru, mentes que un día más tarde va facelo la so madre.
L'abogáu de la moza, Gaby Lasky, aseguró énte los periodistes que la corte considera que los cargos contra ella --asaltu agraváu, llanzamientu de piedres, incitación y participación en disturbios violentos-- son graves abondo "pa siguir detenida hasta'l final del xuiciu", según l'axencia de noticies Reuters.
La moza foi detenida'l 18 d'avientu mentes una operación llanzada en Nabi Salé, al noroeste de Ramala, cuatro díes depués de que cutiera a los soldaos, nel marcu de les protestes convocaes contra la decisión del presidente d'Estaos Uníos, Donald Trump, de reconocer Xerusalén como capital israelina.
El vídeu de los golpes fíxose especialmente popular n'Internet y convirtió a Ahed Tamimi nuna suerte d'heroína pa munchos palestinos defensores de la resistencia. Del llau israelín, l'Exércitu tuvo qu'escuchar crítiques pola pasividá de los dos soldaos afrellaos.
