AVILÉS, 16 Mar. (EUROPA PRESS) -
L'Aeropuertu d'Asturies programó dellos actos pa celebrar nos meses próximos el 50º aniversariu de la so inauguración. Trátase d'una serie d'eventos que tienen por oxetivu "dar a conocer l'actividá del aeropuertu, vamos salir de les oficines y del nuestru espaciu pa cuntar qué facemos", aseguró esti vienres en rueda de prensa'l director del aeródromu, Carlos San Martín.
Los actos van empezar el 23 de marzu, cuando se va celebrar el Día Meteorolóxicu Mundial, con una charra na Delegación del Gobiernu n'Asturies sobre la relación del clima y la meteoroloxía na actividá aeroportuaria. El 24 de mayu'l Centru Valey de Castrillón va acoyer una charra sobre l'aeropuertu y la so redolada. Cinco díes depués los directores que tuvo l'aeródromu van participar nuna charra nel Atenéu Xovellanos de Xixón, pa falar del pasáu, presente y futuru de les instalaciones de Santiagu'l Monte.
El 6 de xunu, na Aula Magna del Edificiu Históricu de la Universidá d'Uviéu, habrá una xornada con espertos pa falar de les peculiaridaes del aeropuertu sobre instalaciones, seguridá o servicios. El 7 de xunu, tamién n'Uviéu, va ser el turnu de les compañíes qu'operen nel Aeropuertu, que van dar la so visión.
L'Aeropuertu d'Asturies inauguróse'l 16 de xunu de 1968, con una inversión de 150 millones d'euros. Dende entós el tráficu creció 60 veces. Na so historia acoyó 31 millones de pasaxeros y 410.000 movimientos d'aeronaves. Ese mesmu día, pero de 2018, l'aeródromu va acoyer una celebración cola participación d'antiguos y actuales trabayadores de les instalaciones. Un día antes el Joven Coro de la Fundación Princesa d'Asturies va ufiertar un conciertu.
A lo llargo del añu van abrir les puertes del aeródromu a dellos colectivos, como escolares o familiares d'empleaos, pa dar a conocer la so actividá. San Martín apuntó que tamién va haber esposiciones y concursos. "El retu ta en que teamos al altor d'una fecha tan especial", dixo.
