L'alcaldesa d'Avilés ofrez la so collaboración a Esteriores pa que'l secuestru acabe "felizmente"

AVILÉS/UVIÉU, 21 de Mayu (EUROPA PRESS)

L'alcaldesa d'Avilés, Pilar Varela, ofreció esti martes la so collaboración al Ministeriu d'Esteriores pa que'l secuestru d'una pareya de turistes avilesinos en Colombia "acabe felizmente".

La primer edil aseguró que se punxo en contactu col gabinete del ministru, en conociendo'l secuestru d'Ángel Sánchez Fernández y María Concepción Marlaska Sedano, trabayadora del Centru d'Impresión del diariu 'La Nueva España' en Silvota.

"Dícenmos que nestos casos prima la discreción y que tanto'l Ministeriu como les embaxaes tienen un protocolu d'actuación que tán cumpliendo dende va díes", afirmó Varela. L'Alministración central ta en contactu cola familia de la pareya avilesina, que nun quiso falar cola prensa.

L'alcaldesa deseó que "too acabe felizmente" y la pareya avilesina "puea tar otra vuelta disfrutando de les sos vacaciones, que yera lo que facíen en Colombia".

Según el diariu colombianu 'El Tiempo', a los rehenes secuestráronlos el vienres pasáu en La Guajira, nel norte del país. Acordies con esti mediu, los sos captores pidieron yá un rescate a cuenta de la so llibertá.

El secuestru prodúxose cuando los dos españoles viaxaben nun coche alquiláu dende Bogotá hasta'l Cabo de la Vela. El so vehículu apaeció'l pasáu 17 de mayu con un ventanu rotu, mientres que'l so equipaxe permanez nel hotel nel que taben agospiaos na zona onde se produxo'l raptu.