UVIÉU/MADRID, 21 de Xunetu (EUROPA PRESS)
El secretariu xeneral del PSOE d'Aragón, Javier Lambán, aseguró esti llunes que ve al presidente d'Asturies, Javier Fernández, nel "encamientu de cualquier responsabilidá" porque cree que ye "personal, intelectual y políticamente ún de los compañeros más importantes, "ún de los personaxes más relevantes colos que cuenta'l PSOE". Amás, defendió que'l partíu nun tendría de "prescindir" del exlehendakari Patxi López nesta nueva etapa.
Asina lo aseguró Lambán en declaraciones a los medios de comunicación tres reunise col futuru secretariu xeneral del partíu, Pedro Sánchez, nel marcu de la ronda de contactos que'l nuevu cabezaleru de los socialistes ta faciendo con tolos dirixentes territoriales.
El dirixente aragonés aseguró que vio a Sánchez "coles idees bien clares, ilusionáu, animáu y bien informáu de la realidá del territoriu". Según dixo, Sánchez esplicó-y los criterios que va aplicar pa nomar a la so Executiva Federal, "integración, potencia, intelixencia y renovación", y él defendió la necesidá de qu'haya una presencia del "territoriu" nos órganos federales.
Con too, tamién-y dexó "claro" que tien de tener "llibertá absoluta" pa designar a los miembros de "la parte medular de la dirección" y garantizó qu'Aragón "va apoyar cualquier decisión que tome al respecto".
HAI NOMES PA FACER "TRÉS O CUATRO EXECUTIVES"
Lambán esplicó que-y plantegó nomes "d'aragoneses que puen tar na dirección, pero nun desveló quién son los sos candidatos. Tampoco esplicó si falaron d'otros nomes y calcó en que se-y ocurren persones "pa facer trés o cuatro executives escelentes toes".
Eso sí, preguntáu por si cree que Patxi López o Javier Fernández puen ocupar la presidencia del PSOE, emponderó a dambos. Del presidente asturianu, dixo que nun lu ve namás como presidente, sinón "nel encamientu de cualquier responsabilidá", porque ye "personal, intelectual y políticamente ún de los personaxes políticos más relevantes colos que cuenta'l PSOE".
Y del exlehendakari destacó que ye "amigu y vecín" y paez-y un "personaxe fascinante dafechu dende'l puntu de vista políticu" del que'l PSOE "nun ha prescindir nesta nueva etapa", na responsabilidá que decida Sánchez.
