Foto: Reuters
MADRID, 2 de Febreru (EUROPA PRESS)
El xuez de l'Audiencia Nacional Fernando Grande-Marlaska archivó la investigación sobre les irregularidaes na contratación del avión YaK-42, que s'estrelló'l 26 de mayu deL 2003 en Trabzon (Turquía), provocando la muerte de 62 militares que volvíen d'una misión n'Afganistán.
El maxistráu asegura que los seis mandos militares que taben imputaos hasta esti momentu nun podríen evitar l'accidente aereu, puesto que nun teníen capacidá pa ello. Reconoz la gravedá de los fechos pero indica qu'hubo una ausencia de responsabilidá "penalmente relevante".
"Nun fueron les circunstancies relatives al estáu y caltenimientu de l'aeronave les causes nin directes nin indireutes del accidente, sinón la preparación concreta de la tripulación", especifica'l xuez nun autu fechu públicu esti xueves.
La causa dirixóse contra l'ex xefe del Estáu Mayor de la Defensa (Jemad), almirante xeneral Antonio Moreno Barberá, al que la Fiscalía atribuyía "toles competencies en cuanto al desarrollu de les misiones internacionales de les Fuerces Armaes" y el xefe del Estáu Mayor Conxuntu (JEMACON), xeneral de División Juan Luis Ibarreta, al que considera "responsable de la contratación" del aparatu.
Tamién taben imputaos el xefe de la División d'Operaciones del Estáu Mayor Conxuntu (Emacon) y del Grupu de Control del Contratu, el contra almirante José Antonio Martínez; el coronel xefe de la Estaya de Loxística de la División d'Operaciones de Emacon, Joaquín Yáñez; y el comandante de la Estaya Loxística d'esti departamentu, Alfonso Elías Lorenzo.
L'accidente del Yak-42 yá se xulgó na Audiencia Nacional pola falsificación de la identidá de 30 de los 62 muertos. El tribunal condenó en mayu del 2009 a trés años de prisión al xeneral Carlos Navarro y a un añu y mediu de cárcel a los oficiales médicos José Ramírez y Miguel Sáez, anque de siguío suspendió la execución de les penes.