UVIÉU, 17 Ene. (EUROPA PRESS) -
L'aprobación nel últimu Congresu Autonómicu de la FSA-PSOE d'una resolución que señala que cuando se reforme l'Estatutu d'Autonomía d'Asturies, los socialistes van defender el reconocimientu de la oficialidá, escoyóse como la meyor noticia pal asturianu del 2017.
Al traviés d'una votación popular fecha n'internet pol colectivu Iniciativa pol Asturianu, el 14,3% de los participantes votó por esta noticia, mui cerca de la que foi la segunda meyor noticia, col 13,9%; la puesta en marcha del plan pilotu pal usu del asturianu como llingua vehicular n'Educación Primaria.
En tercer puestu, y col 12% de los votos, tuvo la noticia la entrada de l'asignatura de Llingua asturiana de forma regulada pela primer vez n'Educación Infantil. "Hasta agora la so presencia dependía de la voluntá y la coincidiencia de capacidá del profesoráu, ensin que tuviera un currículu regláu", señalen dende Iniciativa.
La suma de Conceyos qu'aprobaron reivindicar la oficialidá del asturianu nel Plenu, que representa yá a más del 62,79% de la población asturiana, recibió'l 11% de los votos y ye la cuarta meyor noticia pal idioma del añu 2017.
En quintu puestu, col 7% de los votos, tán los resultaos del III Estudiu Sociollingüísticu d'Asturies, fecha pol director del Euskobarómetro, y qu'ufrió dellos datos positivos sobre l'usu del idioma y l'apoyu a la oficialidá, "que sigue siendo mayoritaría n'Asturies".
L'avance na aprobación de la toponimia tradicional, l'usu del idioma na web del Real Uviéu, el borrador de conclusiones de la comisión d'estudiu del asturianu na Xunta Xeneral, la entrega del primer Premiu Nacional de Lliteratura Asturiana y la emisión en TPA de forma regular partíos de fútbol comentaos n'asturianu, son dalgunes de les otres noticies que recibieron un númberu importante de votos.
