L'asesor del Ministeriu de Mediu Ambiente Jaime Izquierdo refuga que s'estigmatice como peligroses a les incineradores

XIXÓN, 8 de Marzu (EUROPA PRESS)

El ex técnicu del Serida y espertu asturianu Jaime Izquierdo, asesor de la ministra de Mediu Ambiente, señaló que les incineradores nun se puen estigmatizar como peligroses. Según él, "nun lo son más qu'un coche, que sí lo ye si lu lleves a 180 quilómetros por hora por dirección contraria".

Asina lo dixo a los periodistes antes de participar nuna xornada sobre la Insdustrialización de la construcción entamada pol Club Asturianu de la Innovación na Escuela Politécnica del campus de Viesques en Xixón.

Coles mesmes, indicó que "nun hai una solución única sinón que se ta esperimentando con distintos modelos pa ver cómo se pue amenorgar yá dende l'entamu los residuos xeneraos, como ye nel casu de los embalaxes, munchos d'ellos formaos por dellos compenentes qu'enzanquen el so reciclaxe".

Según él, "tamos nun momentu de transición na busca d'una solución a los residuos que se xeneren". Izquierdo señaló que "cada vez hai más envases y aludió a la dificultá dacuando de poder depositalos nel contenedor adecuáu". "Cada vez pelamos menos pataques, porque cada vegada más llevamos les pataques pelaes a casa nun envase", punxo d'exemplu. Al so xuiciu, "tou esti discutiniu afecta a diversos sectores, dende los productores, a los consumidores o a los que recueyen la basura".

Sobre la so ponencia, titulada 'Desarrollu Sostenible=Reciclaxe de polítiques de desarrollu+Activación de les polítiques de mantenimientu', Izquierdo señaló que "la política ambiental nun pue tar relegada al fin del sistema productivu, nin ser la que repare los daños d'ésti, sinón que tien de tar integrada nel mesmu y operar como un factor de control". "Too ello", al so xuiciu, "implica un cambéu de perspectiva importante".

"Per otru llau, les polítiques de caltenimientu de la Naturaleza, que teníen una función más bien pasiva, tienen de ser más actives. Tien qu'haber una economía del caltenimientu pa que'l sistema se caltenga", dixo.

Sobre de la construcción, apuntó que ye un sector que dende'l puntu de vista ambiental xenera problemes importantes, como puea ser el consumu del territoriu. Ye por ello que calificó de bien bona noticia'l que se tea plantegando una nueva forma de construyir y destacó "l'enfoque Ikea" del proyectu, esto ye, el de montar módulos previamente construyíos.

Izquierdo augurió que nel futuru "vamos asistir a cambios radicales en tolos sistemes productivos, apoyaos n'innovaciones tecnolóxiques". Como exemplu, aludió a "los vehículos eléctricos o a viviendes que xeneren enerxía". Ello ye que apuntó qu'España "empieza a ser pionera en delles tecnoloxíes como la enerxía solar, termosolar, la eólica. Empiecen los cambios", aventuró antes d'añadir que'l carbón y el petroleu tienen tovía'l so tiempu.