UVIÉU/XIXÓN, 16 Ago. (EUROPA PRESS) -
La vicesecretaria xeneral del PSOE, Adriana Lastra, manifestó esti xueves en Xixón que dientro de mui poco va conmemorase un añu de los atentaos de Barcelona y Cambrils y aseguró que "esti nun ye momentu pa disensiones y pa buscar rotures sinón pa tolo contrario, pa xuninos más que nunca como sociedá".
Lastra, que visitó la Feria Internacional de Muestres d'Asturies, Fidma, acompañada del secretariu xeneral de la FSA-PSOE, Adrián Barbón, manifestóse asina al ser preguntada pola carta conxunta publicada polos presos soberanistes na que recuerden les víctimes de los atentaos de Barcelona y Cambrils (Tarragona) d'agostu pasáu, emponderen la xera de los servicios d'emerxencia, especialmente de los Mossos d'Esquadra, y critiquen la "falta de collaboración del Estáu".
"Quiero dende equí destacar la mio reconocencia a tolos cuerpos y fuercies de seguridá d'Estáu y tamién a los Mossos d'Esquadra y tamién a la sociedá catalana nel so conxuntu que nos dio una llección a toos de solidaridá y de saber tar nuna situación tan grave como la vivida.
Adriana Lastra indicó que'l Gobiernu socialista tien una "fueya de ruta bien clara" que pasa per acabar cola resquiebra social qu'existe en Cataluña y dientro de la Constitución y del Estatutu d'Autonomía dar los pasos necesarios pa recuperar tamién una tranquilidá y una paz social que ye necesario.
Nesti sentíu punxo en valir el trabayu que'l Gobiernu de Pedro Sánchez ta faciendo siempre "dientro de la Constitución pa dar solución del día a día de los problemes reales de la sociedá catalana" y destacó que tamién se da respuesta a los problemes políticos".
"Diba siete años que nun s'axuntaben el presidentes del Gobiernu y de la Generalitat y en menos de dos meses de Gobiernu l'Executivu socialista fíxolo. Trabayamos en recuperar la normalidá democrática y el diálogu", aportunó Lastra.
