VALENCIA, 29 de Xunetu (EUROPA PRESS)
La estaya cuarta de l'Audiencia Provincial de Valencia absolvió a los 16 acusaos d'integrar la organización neonazi Frente Antisistema (FAS), con sede na capital valenciana, al declarar nules les intervenciones telefóniques y, con elles, el restu de pruebes y acciones practicaes, según informó'l Tribunal Superior de Xusticia de la Comunitat Valenciana (TSJCV).
La causa dirixóse contra 18 persones, pero namás sentáronse nel banquín 16, puesto que de les otres dos, una d'elles ta declarada en rebeldía y l'otra alcontrábse en busca y captura. Ente los que sí se sometieron a xuiciu figuren dos militares, un conceyal de la población valenciana de Silla por España 2000 y l'asesín confesu del mozu de Burjassot Guillem Agulló n'abril de 1993.
El xuiciu, que se celebró hai un par de selmanes na Audiencia de Valencia y mientres el que se vivió dalgún momentu de tensión, entamó col pidimientu de los lletraos de los acusaos de declarar nules les intervenciones telefóniques, dao qu'estimaben que nun se daba'l requisitu de proporcionalidó y de llóxica p'aprobales.
En concreto, los abogaos alegaron que les intervenciones namás motiváronse cola venta d'armes al traviés d'una páxina web, y que les autorizó un xulgáu de Carlet, órganu que consideraben non competente, puesto que la mayoría d'acusaos vivía en Valencia.
El tribunal, tres escuchales, indicó que resolvería sobre esta cuestión na sentencia, y decidió siguir col xuiciu, nel que la mayoría d'acusaos acoyéronse al so derechu a nun declarar, y los pocos que sí lo ficieron negaron cualquier tipu de pertenencia a esti grupu nazi o apurrir cantidaes económiques al mesmu.
Agora, l'Audiencia pronuncióse sobre les intervenciones y declaróles nules, colo que nun tien elementos pa condenar los fechos polos que xulgaron a los acusaos en vista pública. El tribunal llega a esta conclusión al estimar que cuando s'acordaron les intervenciones nun existía nengún niciu oxetivu de comisión de delitu que permitiera frayar el secretu de les comunicaciones.
L'Audiencia considera que la información que se facilitó a la instructora p'acordar diches intervenciones yera inexistente a efectos penales, oxetivamente carente de cualquier niciu razonable. Esta información nacía de la existencia de dos páxines webs que vendíen armes prohibíes, non illegales, sinón prohibíes. Esto ye, la so tenencia nun ta de primeres penada.
La causa vien del añu 2005, cuando se produxeron los arrestos sobre un grupu de persones que presuntamente formaba parte d'una organización denominada Frente Antisistema dende'l 2003. Los sos fines yeren el proselitismu y adoctrinamientu de la ideoloxía nacional socialista, con espardimientu d'informaciones que xustificaben y promovíen l'usu de la violencia contra determinaos grupos raciales, nacionales o ideolóxicos, según consta nos relatos provisionales de les acusaciones.
De primeres detúvose a 22 persones, pero a lo último l'acusación dirixóse contra 18, que s'enfrentaben a un total de 42 años de prisión --tal como reclamaba'l fiscal-- por asociación illegal, tenencia ilícita d'armes prohibíes y tenencia d'armes de fueu reglamentaes.
