L'Axencia pa la Discapacidá cuenta tener llistu a últimos d'esta primavera'l Plan d'Accesibilidá d'Asturies

UVIÉU, 8 de Febreru (EUROPA PRESS)

El director Xeneral de l'Axencia Asturiana pa la Discapacidá, Javier Antuña, refirióse güei na Xunta Xeneral del Principáu al Plan Asturianu d'Accesibilidá y aseguró que "dar feches ye problemático pero espera qu'a últimos de la primavera del 2010 el mesmu llegue a la Xunta". Dixo que si se tarda tanto n'ellaboralu ye porque se trata d'un plan mui participativu y consensuáu.

Destacó que ye un plan integral que s'estructura n'ocho árees de trabayu y qu'implica d'una manera o otra casi la totalidá de conseyeríes, la Universidá d'Uviéu, fundaciones, el colexu d'arquitectos y munchos más organismos. Indicó que ye un plan "mui ambiciosu" que pretenden que valga p'amoldase a los cambios normativos que sufre la discapacidá.

Antuña compareció na comisión de Bienestar Social y Vivienda a pidimientu del PP pa informar sobre tolo rellacionao cola atención y les polítiques desarrollaes col citáu colectivu. Demientres la so intervención, manifestó qu'agora mesmo "yá hai ferramientes pa lluchar contra les desigualdaes" y afirmó que ye un error fiar únicamente al plan toles actividaes.

Javier Antuña recordó l'actividá desarrollada pola Axencia, los convenios, talleres, los estudios y informes. Destacó qu'a lo llaro del 2009 un total de 1.852 persones tuvieron rellaciones directamente col centru asesor d'ayudes técniques que dispón sólo d'una sola persona. La mayor parte reclamaba información.

La diputada del PP, Inmaculada González, criticó los retrasos que lleva la ellaboración del plan que de primeres taba previsto acabar nel 2009 y cuestionó'l trabayu desarrolláu pola Axencia de Discapacidá, asegurando que la mesma tien "poca o nula necesidá d'existir". Dixo amás qu'en cuanto a les feches sobre'l Plan, "el Gobiernu yá nun tien nenguna credibilidá".

González destacó que la mayoría de les actividaes relataes pol director de l'Axencia referíense sobre too a aiciones formatives y demás, pa les que "nun hai falta d'una axencia" y reprochó a Antuña que nun sea a facer "autocrítica cola so xestión". Dixo amás que les polítiques de discapacidá son "la hermanina probe de les polítiques de bienestar", algo qu'al so xuiciu'l propiu Antuña constató nuna entrevista.

Antuña retrucó que l'Axencia algamó duplicar el so presupuestu nel 2009 y llogra caltenelu nel 2010, lo qu'al so xuiciu yá demuestra l'importante pesu del organismu nel Gobiernu autonómicu.