UVIÉU, 20 de Marzu (EUROPA PRESS)
El conceyal de Cooperación, Cultura Tradicional y Política Llingüística del Ayuntamientu de Xixón, Jesús Montes Estrada, presentó güei la convocatoria pa la segunda edición del 'Premiu d'ensayu y trabayos d'investigación Fierro Botas', que destaca los testos d'análisis sobre la rellación de la llingua asturiana y el desarrollu sociocultural de la ciudá y del conxuntu d'Asturies.
Montes Estrada destacó, en rueda prensa, que dende'l Conceyu consideraron "fundamental" caltener el certame, nel que l'añu pasáu sólo participó una obra, anque "dada la so alta calidá" recibió'l premiu y la ublicación del ensayu, que se prevé pa dientro d'un mes. Asina, animó a la participación y señaló que'l ganador va recibir 4.000 euros y la publicación de la obra a cargu del Ayuntamientu.
La convocatoria va tar abierta dende mañana al 31 d'agostu, ampliándose'l plazu en dos meses sobre l'anterior edición, pa "favorecer" la participación. El conceyu del xuráu va celebrase'l 27 de payares y demientres los próximos meses van repartise 30.000 exemplares del dípticu del premiu polos centros municipales y biblioteques de la ciudá.
Amás, Montes Estrada anunció que Fierro Botas va tener una cai en Xixón, ente les de Mariano Pola, y Vicente Jove, xunto al Hogar San Jóse, que se va inaugurar pronto. "Pensóse nesa zona porque ehí al llau impartió clase y desarrolló la so actividá sindical", esplicó señalando que s'aprobó la pasada Xunta de Gobiernu.
