AVILÉS, 14 de Xineru (EUROPA PRESS)
El conceyal de servicios urbanos del Ayuntamientu d'Avilés, Luis Ramón Fernández Huerga, aseguró güei en declaraciones a Europa Press que la propuesta que manexa la Plataforma pa la xestión del agua pública, de convocar un referendu propular pa votar la privatización, ye una forma de "tirar balones fuera".
L'edil socialista realizó estes declaraciones dempués de que na xornada d'ayeri los componentes d'esta plataforma acordaren pidir esti referendu, pa que seya'l pueblu'l que decida qué va pasar cola xestión del agua nel conceyu.
Huerga esplicó que los trámites pa esto son mui complexos. "Pa facer esto se necesita'l 10 por cientu de les firmes de tolos ciudadanos d'Avilés, qu'haya mayoría absoluta nel Plenu y que s'unvíe al Conseyu de Ministros pa que dictamine si se pue facer esa consulta popular, lo cual ye mui improbable, porque nunca pasó en nengún conceyu", argumentó.
A pesar de la presión qu'esta plataforma quier realizar sobre'l gobiernu municipal, los gobernantes lo tienen mui claro. "La maquinaria ya ta en marcha y nun creo que se pare, porque 23 de los 25 conceyales del Ayuntamientu tán a favor d'esto", resaltó Huerga.
El conceyal socialista tampoco s'escondió, y criticó nuevamente la forma d'actuar de los componentes de la Plataforma del Agua. "Nun importa los datos que tenemos enriba la mesa digan que'l coste va ser menor pa los ciudadanos, o que se meyore'l serviciu, simplemente sólo importa que seya una sociedá pública, lo cual ye mui egoísta, porque si nun se fai lo qu'ellos quieren nun val", señaló Huerga.
A lo último, el conceyal de servicios urbanos esplicó que l'actitú d'esta Plataforma "respuende única y esclusivamente a un grupu mui determináu que pertenez a IU", acabó.
