LONDRES, 24 d'Ochobre (Reuters/EP)
El virus del ébola podría matar a 90.000 persones ya infectar a 170.000 antes d'últimos d'añu en Liberia, el país más afectáu pola enfermedá, si nun aumenten dramáticamente los esfuerzos pa torgar la so espansión, según un estudiu publicáu esti vienres pola prestixosa revista médica 'The Lancet'.
"Les nueses predicciones", apunten les conclusiones, "ponen de manifiestu que'l marxe de maniobra pa controlar l'españíu del virus y evitar un balance catastróficu dafechu ta reduciéndose a toa velocidá", indicó una de les responsables del estudiu, Alison Galvani, nun comunicáu.
Según l'informe, un estudiu de la espansión del virus nel condáu liberianu de Montserrado, epicentru de la enfermedá y llugar onde ta la capital, Monrovia, si llevanten centros médicos adicionales y quintuplíquense los esfuerzos de detección de nuevos casos, podríen evitase un total de 98.000 casos adicionales en tol país.
Pero si nun se potencien los esfuerzos pa controlar la epidemia, naide sabe exactamente cuántes persones van morrer, y la realidá ye que "la escala de les intervenciones que tamos rexistrando baxa en comparanza les que van ser necesaries", acordies con otru de los responsables del estudiu, Joseph Lewnard.
