Les autoridaes llocales ofrecen una recompensa por información sobre los dos avilesinos secuestraos en Colombia

BOGOTÁ, 22 de Mayu (EUROPA PRESS)

Les autoriaes llocales ofrecieron un pagu de 50 millones de pesos colombianos (unos 20.925 euros) a cuenta d'información que permita alcontrar a los dos turistes españoles secuestraos el vienres pasáu nel departamentu de La Guajira, nel norte de Colombia, según informen los medios llocales.

A Ángel Sánchez Fernández y María Concepción Marlaska Sedano secuestráronlos cuando facíen turismu nesta zona del país, sin qu'hasta agora tea claro quién ta detrás del secuestru dende qu'esti martes l'Alcaldía d'Uribia, población próxima a onde s'alcuentra'l so coche alquiláu, y la Policía ofrecieren el pagu en cuenta de información sobre los captores.

Según la reconstrucción de los fechos realizada hasta agora poles autoridaes colombianes y que recueye'l diariu 'El Tiempo', los dos españoles salieron de Bogotá el 2 de mayu camín de la costa norte del país, y agospiáronse nun hotel de Santa Marta, onde tovía permanez el so equipaxe.

Acordies con esti diariu, la información que contién el sistema de llocalización vía satélite del coche alquiláu polos dos turistes ye clave pa conocer los sos movimientos antes del secuestru. Según pudo saber 'El Tiempo', la pareya llegó'l vienres pasáu a Maicao, cerca de la frontera con Venezuela.

Dende ellí, el coche desplazóse hasta Uribia y a lo último alcontráronlu indíxenes wayús a 85 kilómetros d'esi conceyu. El coche d'alquiler tenía ún de los ventanos rotos.

POSIBLES SECUESTRADORES

Según el diariu, con esta información, les autoridaes abarrunten que'l secuestru pudiera ser obra d'un grupu delictivu que viera a los dos turistes nel entornu del so hotel y que dempués-yos obligaren a desplazase a algún llugar.

"Nun descartamos un contuberniu ente bandes pequeñes y un grupu entamáu más grande, como una 'bacrim' o les FARC", señaló un altu oficial, en referencia al acrónimu emplegáu en Colombia pa referise a les bandes criminales y a la guerrilla de les Fuerces Armaes Revolucionaries de Colombia (FARC).

Según esti responsable, nesa zona operen grupos como la banda de 'los Aguaditos', qu'estorsiona a comerciantes y que nel últimu añu secuestraron a dos ganaderos y a dos libaneses que viven en La Guajira.

Per otra parte, la Policía tamién revisó los vídeos de les cámares que tienen los peaxes ubicaos nel percorríu de Santa Marta a Maicao. Nellos vese'l coche pero nun foi posible identificar a les persones que viaxen nel so interior, dao que tien cristales polarizaos.