Les families dediquen el 29% de la so renta a la compra de vivienda

   Les families españoles destinaron el 29% de la so renta bruta disponible a financiar la compra de vivienda demientres el cuartu trimestre del 2009, más de doce puntos porcentuales menos que nel mesmu periodu del añu anterior (41,6%), según los últimos datos del Bancu d'España.

   Asina, la cifra algamada asítiase en niveles inferiores a los del 2005, cuando la renta bruta de les families que se dedicaba pa esti fin quedó nel 36,4%.

   La cantidá que les families destinaron a la compra de vivienda siguió incrementándose a lo llargo del 2008, al tiempu que lo facía l'Euríbor, el tipu de referencia de la mayoría de les hipoteques n'España, que llegó a algamar el so máximu nel mes de xunetu (5,393%).

   Sicasí, el porcentaxe de la renta pa la compra de vivienda cayó nel últimu trimestre del 2008, tres asitiase nel máximu del 52,8% ente xunetu y setiembre, en consonancia colos últimos descensos de los tipos d'interés y la progresiva reducción del Euríbor, que zarró'l 2008 nel 3,452%.

   Amás, el preciu mediu de la vivienda llibre quedó en 1.892,3 euros por metru cuadráu al zarru de 2009, con un descensu interañal del 6,3%, según los datos espardíos güei pol Ministeriu de Vivienda.

   Nesta mesma llinia, l'importe mediu de les hipoteques sobre viviendes baxó un 15,8% n'ochobre en rellación al mesmu mes del 2008, hasta asitiase en 113.882 euros, según datos del Institutu Nacional d'Estadística (INE).

UNA VIVIENDA CUESTA 6,8 VECES LA RENTA DISPONIBLE

   Según el Bancu d'España, al acabar el pasáu añu'l preciu d'una vivienda de tipu mediu (93,75 metros cuadraos) yera 6,9 veces superior a la renta bruta disponible d'una familia mediana, trés décimes menos qu'hai un añu.

   Descontando les deducciones por compra de vivienda al traviés del IRPF (un 15% con carácter xeneral hasta un máximu de 9.015 euros añales), les families destinaron el 35,9% de la so renta bruta disponible a financiar la compra de la so vivienda nel 2008, cifra inferior a la del cuartu trimestre d'esi añu (51,7%).