MOSUL (IRAQ), 21 de Marzu (Reuters/EP)
Les fuerces iraquines intentaron evacuar a los civiles de la Ciudá Vieya de Mosul esti martes pa que les tropes pudieren llimpiar la zona, pero los francotiradores del grupu terrorista atrabancaron los sos esfuerzos, según informaron oficiales iraquinos.
Los oficiales aseguraron que los insurxentes tamién tán utilizando a los civiles como escudos humanos pa que les unidaes del Gobiernu nun lleguen a la histórica mezquita d'Al Nuri, el focu de recién combates mientres los cinco meses de campaña contra Estáu Islámicu na ciudá, principal bastión n'Iraq.
"Les nueses fuerces controlen agora cerca del 60 por cientu del oeste", señaló nuna conferencia de prensa'l voceru del Ministeriu de Defensa, el xeneral Yahya Rasool. "Agora trátase de la Ciudá Vieya, que tien cais pequeñes y ye malo de combatir colos civiles dientro. Tamos tratando d'evacualos", añadió.
La recuperación de la mezquita supondría un golpe d'enorme importancia simbólica contra la organización yihadista porque foi precisamente ellí onde'l so líder, Abú Bakr al Baghdadi, proclamó en xunetu del 2014 el "califatu" de la organización.
"Alcontrámonos a pocos cientos de metros de la mezquita. Tamos avanzando hacia Al Nuri. Sabemos que significa muncho pa Daesh", aseguró'l xeneral, utilizando l'acrónimu árabe d'Estáu Islámicu.
Polo menos 600.000 civiles permanecen nel sector oeste de Mosul, anque miles d'ellos escaparon nos últimos díes.
"Hai munchos francotiradores nos teyaos de los edificios de la Ciudá Vieya sobre la mezquita Al Nuri. Precisamos evacuar a les families que tán nel so interior, dao que los utilicen como escudos cuando avanzamos hacia la mezquita", señaló'l xeneral de la brigada Saad Maantold.
En Washington, el primer ministru iraquín, Haider al Abadi, aseguró esti llunes, tres reunise col presidente estaounidense, Donald Trump, qu'Estaos Uníos-y confirmó que "l'apoyu nun solo siguirá, sinón que va entainase".
