UVIÉU, 11 de Payares (EUROPA PRESS)
L'escritor y periodista Lluis Portal, conocida pluma del ámbitu de les lletres asturianes, alzóse col 'Premiu Máximo Fuertes Acevedo' d'ensayu en llingua asturiana que concede la Conseyería de Cultura y Deporte del Principáu. El so trabayu, 'Cipriano Folgueras, una gloria d'Asturies', ta dedicáu a esti escultor, figura que recupera con una obra de carácter biográficu.
La Conseyería de Cultura del Gobiernu Asturianu fizo públicu esti vienres el fallu del xuráu, aconceyáu ayeri baxo la presidencia del Director Xeneral de Política Llingüística, Alfredo Álvarez Menéndez, y cola participación de los escritores Vicente García Oliva, ganador de la edición anterior del premiu; Xosé Anxelu Gutiérrez Morán, doctor en Bioloxía y investigador del Centru Oceanográficu de Xixón; y Vital d'Andrés Díaz. El premiu ta dotáu con 7.000 euros.
Según diz l'acta, ente les obres presentaes, el xuráu decidióse por unanimidá conceder el Premiu al testu tituláu 'Cipriano Folgueras, una gloria d'Asturies', destacando "el carácter biográficu del ensayu y el trabayu de recuperación de la figura y la obra d'un escultor brillante olvidáu pola sociedá asturiana". "L'autor, con un bon dominiu críticu y estéticu, conduz al ambiente del mundu de la escultura española d'últimos del sieglu XIX y primeros del XX", consideren los miembros del xuráu, que ponen de relieve amás "la implicación emocional del autor cola figura del escultor".
El testu ganador presentóse baxo'l seudónimu 'Xandru'. Lluis Portal Hevia (Villaviciosa, 1964) ye periodista y como tal collabora con distintos medios de comunicación (La Voz d'Asturies, Notícies-yos, Asturies Deportivu, Maliayo, etc).
Como escritor tocó distitnos xéneros lliterarios: el cuentu, la novela xuvenil, el teatru, la poesía o la biografía. De la mesma manera, destaca na investigación etnográfica. Ente los sos llibros publicaos tán 'Trófimo y Radamés' (Ediciones Caveda y Nava, 1991), 'Francisco Balbín, Xiquín de Villaverde' (Asociación Cubera, 1995) y Secretos de Pandenes (Trabe, 2006).
Puen alcontrase collaboraciones suyes en Lletres Asturianes o la revista Albentestate. También ganó dellos premios: 'Premiu Uviéu de Teatru 2007' pola obra 'Oh, 36!', 'Premiu Uviéu de Teatru 2008' con 'Poison', 'Premiu de llectures pa rapazos 2009' pola obra 'Pelegrinos del abismu' o 'Premiu Asturnews' de lliteratura infantil y xuvenil 2009 con 'El club de los valientes'.
