L'Euríbor diariu baxa hasta'l 3,126% y va pesllar el mes nel 3,4%

EP

MADRID, 29 d'Avientu (EUROPA PRESS)

L'Euríbor, tipu al que se conceden la mayoría de les hipoteques n'España, continúa la tendencia baxista qu'entamó hai yá 55 díes y se colocó güei nel 3,126% na so tasa diaria, el más baxu dende'l 17 de marzu del 2006, y va pesllar el mes nel 3,4%, cota que nun algamaba dende xunu del 2006, cuando peslló nel 3,401%.

A falta de dos díes pa qu'acabe'l mes d'avientu, l'Euríbor colocó güei la so tasa mensual nel 3,493%, 0,857 puntos perbaxo del nivel de payares, que s'asitió nel 4,35%, colo qu'encadena'l tercer mes siguíu de descensos.

Cola nueva cayida del Euríbor n'avientu, los usuarios que tengan una hipoteca media de 150.000 euros, a un plazu de 26 años y con un diferencial de 0,75 euros, van notar una rebaxa d'unos 114 euros nes sos cuotes mensuales, puesto que van pagar unos 794 euros, frente a los aproximadamente 908 euros que pagaben un añu enantes.

Los espertos auguren que l'Euríbor va siguir baxando demientres el próximu añu y qu'hasta podía asitiase sobre'l 2% na primer metá ante les previsibles baxaes de tipos d'interés que van continuar aplicándose demientres 2009.

De fechu, la cayida en picáu del Euríbor entamó'l pasáu 10 d'ochobre, díes dempués de que'l BCE y la FED y dellos bancos centrales aplicaren un recorte históricu de tipos d'interés, que se consolidó'l pasáu 4 d'avientu tres la baxada del preciu del dineru hasta'l 2,5%.

Amás, a la estabilidá de los mercaos contribuyeron les midíes adoptaes polos gobiernos internacionales p'aumentar la lliquidez y otres como l'acordada pol BCE d'ampliar a 200 puntos básicos la banda ente la tasa de facilidá de depósitu --el pagu que perciben los bancos polos sos depósitos na entidá-- y el tipu marxinal de creitu mediante la reducción de la primera en mediu puntu porcentual y la subida de la segunda na mesma proporción, pa estimular a les entidaes a prestase más ente sí.