BAGDAD, 30 de Mayu (Reuters/EP)
L'Exércitu d'Iraq llanzó esti llunes l'asaltu final pa reconquistar la ciudá de Faluya, controlada pol grupu terrorista Estáu Islámicu y asitiada a unos 50 kilómetros de la capital iraquina, Bagdad, según un voceru militar.
L'Exércitu iraquín entamó la ofensiva pa recuperar Faluya'l pasáu 23 de mayu, cuando reforzó'l bloquéu que caltenía sobre esta ciudá. Esti llunes, llanzó l'asaltu qu'espera seya definitivu, pa lo que cuenta con ayuda de la coalición que lidera Estaos Uníos.
Les fuerces del Gobiernu llograron "una firme meyora" nes primeres hores, según un comunicáu lleíu pola televisión y que confirmó bombardeos per parte de la coalición antiterrorista internacional.
Nel distritu de Naimiya, na parte sur de Faluya, rexistráronse esplosiones y disparos, según comprobó un periodista de Reuters cercanu al mandu de combate. La televisión yá informó de la toma d'esta zona per parte de la unidá militar d'élite, l'Equipu de Respuesta Rápida.
La coalición de milicies chiínes Movilización Popular, que sí participó n'ofensives anteriores del Gobiernu, optó nesta ocasión por llendar la so implicación a consolidar les meyores llograes en Saqlawiya, al norte de Faluya. Quedando al marxe, quieren evitar un empeoramientu de les tensiones ente distintes sectes relixoses.
Faluya tornó en xineru del 2014 na primer ciudá en cayer en manes de los yihadistes y, seis meses dempués, éstos autoproclamaron un 'califatu' qu'abarcaba tol territoriu conquistáu n'Iraq y Siria. Trátase del bastión d'Estáu Islámicu más cercanu a Bagdad y, gracies a esta base, los terroristes cometieron tou tipu d'ataques na capital.
MOSUL
Per otra parte, les fuerces de seguridá curdes confirmaron avances na so llucha contra Estáu Islámicu cerca de Mosul, onde tomaron delles localidaes hasta agora controlaes polos yihadistes. Mosul ye la mayor ciudá iraquina baxo control rebelde, con una población averada a los dos millones d'habitantes.
Les fuerces 'peshmerga' llanzaron el domingu una ofensiva que yá-yos permitió recuperar seis poblaciones --tamién con apoyu de la coalición estaounidense--, según el Conseyu de Seguridá del Kurdistán iraquín. Los conceyos recuperaos tán unos 20 kilómetros al este de Mosul.
