L'exiliu de Guinea Ecuatorial considera "repunante" que Zapatero reciba al primer ministru d'esti país

MADRID, 24 de Xunetu (EUROPA PRESS)

El Gobiernu de Guinea Ecuatorial nel exiliu consideró güei "repunante" l'actitú del Executivu español, ente otres coses, pola so decisión de recibir esta tarde na Moncloa al primer ministru ecuatoguineanu, Ignacio Milan Tang.

Nesti sen, afirmó nun comunicáu que "España sigue xugando a les cartes", y que dende que'l presidente, José Luis Rodríguez Zapatero,"llegó al poder valió-y p'amigase con dictadores y caudiellos", en referencia al presidente de Guinea Ecuatorial, Teodoro Obiang Nguema, qu'ocupa'l cargu dende'l golpe d'Estáu que dio en 1979.

El gobiernu nel Exiliu acusó al ministru d'Asuntos Esteriores español, Miguel Ángel Moratinos de "ensin perder un solu minutu y pese a nun tar previstu n'axenda", llograr que'l primer ministru ecuatoguineanu "seya recibío güei d'urxencia na Moncloa".

D'esta maneera --prosiguió--, Zapatero, que va recibir a Milan Tang, "con un solu xestu pon a España a los pies del dictador", dexando qu'ésti "se llimpie la suela los zapatos na Moncloa, símbolu de les llibertaes que tantu sudor, tantu esfuerzu y tanta sangre costaron a los ciudadanos españoles".

Poro, el Gobiernu de Guinea Ecuatorial nel exiliu condenó "enérxicamente" la visita oficial de Milan Tang, la cual describió como un "nuevu exemplu de la rendición d'España a la política del caudiellu d'Obiang Nguema" y una "falta de respetu" a la Constitución española y a la carta universal de los Derechos Humanos.

Al so xuiciu, la decisión del Gobiernu español de recibir a les autoridaes ecuatoguineanes "significa una clara reconocencia a la política de pistoleros d'Obiang Nguema per parte d'un gobiernu que cada día ye menos democráticu y menos independiente".