El Partíu Llaborista británicu afronta la peor derrota ellectoral dende los años 30 del sieglu pasáu, según revela la 'Encuesta de les encuestes' espublizada pol diariu 'The Independent', onde s'espeya que, de cellebrase unes xenerales, la formación baxaría de la llende de los 200 escaños nel Parlamentu y los conservadores algamaríen unos 395 diputaos que-yos garantizaríen la hexemonía en Westminster durante polo menos una década.
Los datos representen una compilación de sondeos anteriores, que yá apuntaren una tendencia causante del alderique al rodiu de la continuidá del primer ministru, Gordon Brown, que nel únicu añu que lleva nel poder yá conduxo al Llaborismu a cuatro derrotes consecutives nes urnes y a los peores niveles d'aceptación de practicamente tola so hestoria.
Asina, de celebrase güei unos comicios xenerales, el partíu que nos últimos 11 años ta nel poder diba llevar namás un 27 por cientu de los votos, escontra'l 44 por cientu que diben algamar los 'tories', que protagonizaríen un vuelcu ellectoral de tala magnitud que dexaríen al llaborismu a 132 asientos de distancia na Cámara de los Comunes. Un marxe que, según los espertos, diba asegurar a David Cameron polo menos una década nel númberu 10 de Downing Street.
Pela so parte, con Brown al frente, los llaboristes diben cayer hasta los 195 diputaos y volveríen a tener una representación perbaxo de los 200 escaños, que nun se produz dende la década de los 30, nin siquier nos años de dominiu conservador de Margaret Thatcher, cuando incluso'l consideráu llaceriosu saldu de Michael Foot en 1983 foi superior, yá qu'algamó los 209 parlamentarios.
Amás, los resultaos diben suponer la reducción a practicamente la metá de l'actual presencia llaborista en Westmister, y diba a afectar a dalgunos de los principales ministros del Gobiernu, como'l propiu titular de Facienda, Alistair Darling, la d'Interior, Jacquie Smith; o'l responsable de Negocios, John Hutton. Pola so parte, el balance conservador sedría comparable a los márxenes algamaos por Tony Blair nes sos dos primeres ellecciones, en 1997 y 2001.
PRESIÓN SOBRE BROWN
D'esta miente, la encuesta añade presión adicional pa Brown, que continúa'l so descensu de popularidá hasta niveles que n'époques recientes solo supera Michael Foot, precisamente'l candidatu derrotáu pola 'Dama de Fierru' nos años d'hexemonía conservadora nel Reinu Xuníu, y con una evolución, acordies colos analistes, imposible de reconducir.
Amás, otru revés pal primer ministru ye que, escontra la so promesa "d'aguiyar al país en tiempos difíciles" y el so mirar esclusivu pola economía como responsable de los problemes, la encuesta espeya que los ciudadanos nun tan enfotaos na so capacitación pa facer frente a la crisis financiera y que'l so prestixu como xestor, llabráu na década que se caltuvo al frente de la cartera del Tesoru, tien dao pasu al escepticismu.
Asina, menos d'un quintu de los sos votantes creen que'l dirixente escocés tea realizando un bon trabayu nel númberu 10 de Downing Street, mientres qu'un porcentax similar reconoz tar insatisfechu col balance llaborista y los niveles de desilusión col Gobiernu son equiparables a los carecíos pola Alministración Thatcher poco enantes de ser relegada pol so propiu partíu en 1990.