Llamazares descártase como candidatu d'IU p'Asturies y diz que "hai un bon banquín"

EUROPA PRESS

MADRID/UVIÉU, 2 de Febreru (EUROPA PRESS)

El diputáu d'Izquierda Xunida por Asturies nel Congresu, Gaspar Llamazares, refugó esti xueves la posibilidá de presentase a les elecciones asturianes, adelantaes pol presidente autonómicu, Francisco Álvarez Cascos.

"Soi diputáu por Asturies y quiero facer el mio trabayu de diputáu", manifestó Llamazares nuna entrevista en Telemadrid recoyida por Europa Press, y en señalando qu'él nun pue ser "candidatu pa tou". Amás, Llamazares mostróse "ilusionáu" cola so situación actual, que-y permite dir y volver d'Asturies "continuamente" y combinar el so llabor como diputáu por Asturies coles sos responsabilidaes dientro del grupu parlamentariu.

Igualmente, destacó que "hai un bon banquín n'Asturies y ellos van saber adoptar una iniciativa que-yos permita "meyorar los resultaos sin necesidá de personalismos". Al so xuiciu, "lo qu'asocedió n'Asturies ye la demostración de que los personalismos en política traen bien males consecuencies".

Llamazares llamentó la situación a la que se llegó n'Asturies "ente la soberbia de Cascos y la vendetta del PP, que se sintió traicionáu con esta fracción de la derecha". Amás, consideró que "los ciudadanos asturianos tendríen qu'aprender que la derecha, en dos causes, nun supo qué facer col Gobiernu d'Asturies y lo que traxo ye una crisis política sobre una crisis económica".

N'otru orde de coses, Llamazares criticó'l "durísimu axuste" a nivel européu, que considera ta "enfriando la economía y provocando la recesión económica", inspiráu, según él, en "la política neolliberal y protestante" de la canciller alemana, Angela Merkel. Nesi sen, apostó por "midíes d'iniciativa pública" pa recuperar la economía.

"MODELU LLABORAL A LA CARTA"

No que se refier a España, Llamazares aseguró que "nun hai un problema de flexibilidá llaboral" y que "el mercáu llaboral español ye bien flexible". "Tenemos más de 30 modelos de contratu. Tenemos un modelu llaboral a la carta", calcó.

Coles mesmes, Llamazares preguntó cuál foi'l resultáu de les trés reformes llaborales llevaes a cabu pol Gobiernu de José Luis Rodríguez Zapatero. "Pues que siguimos destruyendo empléu y destruyímoslu al traviés d'una figura introducida nuna de les reformes llaborales, que ye'l despidu oxetivu por razones de previsiones económiques, ési ye l'arma de destrucción masiva del empléu nel nuesu país", respondió.

Pa Llamazares, el problema d'España ye la falta de financiación y "mientres nun haya demanda, les empreses nun van producir bienes y van despidir a los trabayadores".

Sobre la reforma financiera que va llevar a cabu'l Gobiernu, dixo qu'avanza nun modelu de fusiones y alvirtió que cuanto más grandes seyan los bancos "l'autoritarismu de la banca va ser cada vez mayor".