Llamazares (IU) pregunta al Gobiernu sobre los monumentos del Prerrománicu asturianu

UVIÉU, 8 de Marzu (EUROPA PRESS)

El diputáu d'Izquierda Unida nel Congresu de los Diputaos, Gaspar Llamazares, presentó una batería d'entrugues dirixíes al Gobiernu pa la so respuesta escrita na que solicita información relativa a monumentos del Prerrománicu asturianu.

Nel so escritu, según informó IU d'Asturies al traviés d'una nota de prensa, fai alusión a la Ilesia de San Miguel de Lillo, el Palaciu de Ramiro I (Santa María del Narancu), la Ilesia de Santuyanu, La Foncalada, o la Ilesia de Santa Cristina de L.lena.

Llamazares pregunta cuál foi'l siguimientu realizáu pol Ministeriu de Cultura sobre los mentaos bienes p'asegurar el caltenimientu de les característiques y cualidaes que motivaron la so inclusión nel llistáu de Patrimoniu Mundial de la Unesco. Tamién pregunta pol control de Cultura sobre los proyectos obres o actividaes que se realicen nel entornu de los monumentos.

A lo último, el diputáu d'IU interésase polos "protocolos qu'articuló'l Ministeriu de Cultura na Ilesia de Santuyanu y Foncalada con cuenta de caltener la so naturaleza de patrimoniu mundial, dada'l so localización urbana y, poro, sometimientu a los peligros consustanciales de la xestión urbanística nel nuesu país.

Pela so parte, IU d'Uviéu decidió repartir unos 3.000 dípticos nos que reclama protección pa los distintos monumentos del Prerrománicu, per parte de les trés alministraciones implicaes: Conceyu d'Uviéu, Principáu d'Asturies y Gobiernu d'España.