AVILÉS, 18 Jul. (EUROPA PRESS) -
El grupu de folk asturianu Llan de Cubel y el debú n'España de la banda escocesa Dallahan son les grandes atracciones el festival Intercélticu d'Avilés. El conciertu va celebrase'l sábadu 28 de xunetu a les 23 hores na Pista de la Esposición. Un día enantes va ser el turnu del rock de Dixebra y Spanta la Xente.
Esta ye una de les novedaes de la vixesimosegunda edición del festival Intercélticu d'Avilés que se presentó esti martes nel consistoriu avilesín cola presencia de la conceyala de cultura, Yolanda Alonso, y el director del festival, Juan Casas.
Esta edición va celebrase ente'l 22 y el 29 de xunetu, con una carpa instalada na Pista de la Esposición de Les Meanes, que va ser l'epicentru del festival. La organización espera superar la cifra de 20.000 asistentes de la edición pasada. "Dende va unos años tenemos el total respaldu del Conceyu na organización del Festival, y el cambiu d'allugamientu a Les Meanes, que foi idea de la conceyalía, foi un aciertu pa tener más visitantes", apuntó Juan Cases.
Una de les novedaes d'esta edición, ye l'empiezu del festival, con una llacuada estilu celta'l domingu 22 de xunetu. "Queremos facer una llacuada estilu celta, qu'habría que facer con xabalín, pero como ta fuera de temporada, decidimos ufiertar daqué autóctonu como'l gochu asturcelta, y siguir poniendo de relieve lo nuestro, nesti festival", esplicó'l director del Intercélticu.
La llacuada tien un númberu de places máximes de 75, y pa participar los interesaos tienen d'inscribise na web del festival enantes del vienres 20 de xunetu a les 23.59 hores. El preciu por comensal ye de 25 euros y los asistentes tienen qu'asistir vistíos con paxellos celtes.
Amás otra de les novedaes ye qu'amás de los conciertos nocherniegos, acaldía va haber actuaciones a les 14 hores pa amenizar la comida y el vermú. El folk-rock va tener un papel protagonista nos conciertos, sobremanera el del vienres 27 de xunetu a les 22.30 hores. "Vamos cuntar colos grupos 'Dixebra' y 'Spanta la Xente', que son los grupos de tradición asturiana con más tirón ente'l públicu", comentó Juan Casas.
El festival compleméntase con un Mercáu Celta, dellos pasucais polos rincón de la ciudá de les bandes convidaes, esposiciones nel Palaciu de Valdecarzana, y una recepción de l'Alcaldesa, Mariví Monteserín a los grupos participantes el 27 de xunetu a les 13.00 hores. Nesta edición les bandes participantes vienen de Irlanda, Escocia, Asturies y Galicia.
