UVIÉU, 21 de Febreru (EUROPA PRESS)
La Conseyería d'Educación y Cultura, al traviés de la Dirección Xeneral de Planificación Llingüística y Normalización, entamó esti llunes 20 de febreru en Mieres y martes 21 de febreru en Siero, actos institucionales de celebración pa promover la diversidá cultural y llingüística del Principáu d'Asturies, qu'incluyeron llectures de testos lliterarios, representaciones teatrales y actuaciones musicales.
Otramiente, nos centros educativos del Principáu d'Asturies va lleyóse un manifiestu con motivu del Día internacional de la Llingua Materna que se celebra'l 21 de febreru, mesmo que testos n'asturianu y en gallego-asturianu.
La iniciativa enmarcóse nel Día Internacional de la Llingua Materna, que la UNESCO celebra cada 21 de febreru pa recordar la importancia de protexer y favorecer el multillingüismu, col lema 'Educación de calidá, llingües d'enseñanza y resultaos d'aprendizaxe'. La intención ye dexar patente la importancia de tolos idiomes, y n'especial de les llingües maternes, pa consiguir una educación de calidá.
El motivu central de la celebración year la visibilización del asturianu y del gallego-asturianu como llingua materna y como una ayalga cultural propia, que aumenta la calidá de la educación a tolos niveles col usu, ameyorando les capacidaes de comprensión y creatividá, al empar que favorez l'arriquecimientu de les relaciones sociales y de les estratexes comunicatives.
La celebración contó con dos actos institucionales. El primeru tuvo llugar esti llunes 20 de febreru a les 11.30 de la mañana, nel Auditoriu de la Casa de la Cultura "Teodoro Cuesta" de Mieres del Camín, cola participación de tolos centros d'Enseñanza Secundaria del conceyu de Mieres y l'actuación musical d'Anabel Santiago, ganadora del Premiu al Meyor Cantar 2016. El martes 21 de febreru, a la mesma hora, nel Auditoriu Municipal de La Pola Siero, l'alumnáu de los centros d'Educación primaria ya Infantil de la población participó nun actu que zarró'l grupu de teatru 'El Callejón del Gato', representando la obra Grana de Cardamomu.
