UVIÉU, 17 Nov. (EUROPA PRESS) -
Ediciones Trabe ta acabantes de publicar 'Un nataliegu perbullindiegu', del escritor Víctor Raúl Pintado Rey y con ilustraciones d'Alberto Álvarez Peña. Trátase del primer llibru infantil centráu nuna tradición qu'hai décades yera un vezu na Navidá asturiana.
La costume consistía en quemar nel llar el Nataliegu -un tueru de carbayu- la nueche de Navidá y esparder les cenices pela casa y la corte pa que traxeren bona nación y bones colleches a la familia. Malapenes queda yá'l recuerdu d'esta tradición de la que namás queden testimonios en conceyos como Grau, Casu, Llaviana, L.lena o Tinéu. Agora, esti llibru quier tresmitir a les xeneraciones más moces esta tradición.
El cuentu fala de como los tiempos cambiaron y el Nataliegu de Xela nun quier por nada del mundu que lu quemen, asina que monta un espolín al sentir la palabra 'quemar'. "Y ye que, como diz Xela, a los nataliegos d'anguaño présta-yos más enguapiar les cases que ser ceniza", señalen dende Ediciones Trabe.
Esta tradición asturiana, rellacionada tamién cola del árbol de navidá, tien formes asemeyaes a lo llargo de toa Europa, como'l Tió de Nadal catalán o'l Yule log inglés, por mentar dos de los más famosos. El llibru tamién se publica con una edición en gallego-asturianu titulada 'Un tronquín bullicego'.
