BERLÍN, 27 de Marzu (Reuters/EP)
El copilotu del avión de Germanwings que s'estrelló'l martes nos Alpes franceses, Andreas Lubitz, tapeció la so enfermedá a la empresa y tenía un parte de baxa na so casa pal día nel que se produxo la traxedia, según informó esti vienres la Fiscalía de Dusseldorf, que rexistró'l so pisu.
Según precisó, mientres el rexistru nun s'alcontró nenguna nota de despidida nin de reivindicación nin tampoco se tienen de momentu pruebes qu'apunten a un motivu políticu o relixosu na so manera d'actuar.
Lo que sí alcontró, añadió, son documentos que demuestren que carecía una enfermedá y que taba baxo tratamientu médico. Ente ellos, había una baxa por enfermedá rota actual y que "tamién cubría'l día" del vuelu. Coles mesmes, la Fiscalía considera que Lubitz "tapeció la so enfermedá" a Germanwing y a los sos compañeros.
La Fiscalía, que nun precisó de qué enfermedá se trata, esclaró que va llevar díes evaluar los documentos alcontraos, pero aseguró qu'asina haya novedaes van dales a conocer. Amás, esclaró que yá s'informó a les autoridaes franceses del descubrimientu.
El copilotu tuviera "suspendíu mientres meses" por Lufthansa na so etapa de formación, nel 2009, y tenía un historial de depresión por una "crisis existencial" cuando se zarró na cabina del avión Airbus A320 que s'estrelló'l 24 de marzu nos Alpes franceses, según informó'l diariu británicu 'The Times'.
Nun artículu tituláu 'Lufthansa conocía la depresión del pilotu', el rotativu británicu indicó que'l copilotu tenía "un historial" de depresión provocada por una "crisis existencial", cuando decidió facer topetar l'avión con otres 149 persones a bordu nos Alpes franceses.
Amás, informó de qu'a Lubitz suspendiéronlu na escuela de vuelu de Lufthansa "mientres dellos meses" antes que-y dexaren volver a entrenase y a evaluase "como pilotu". El presidente de Lufthansa, Carsten Spohr, afirmó esti xueves en rueda prensa que Lubitz tuvo "una interrupción" de dellos meses na so etapa de formación por una baxa médica, sin especificar "de qué se trataba pol secretu médicu".
Pela so parte, el diariu alemán 'Bild' señaló que Lubitz recibió tratamientu psiquiátrico por un grave "episodiu depresivu" va seis años, nel 2009. L'episodiu incluyía "crisis d'ansiedá y depresiones" y llevó al nuevu a recibir tratamientu psiquiátrico mientres 18 meses.
La Fiscalía de Francia, n'escuchando'l conteníu de la caxa negra que rexistra les voces en cabina, acusó esti xueves al copilotu Lubitz de causar voluntariamente l'accidente anque nun ofreció nenguna razón pa xustificar esta actuación.
