Al Maliki diz que'l pactu de seguridá con EE.UU ye la meyor opción pa recuperar la soberanía iraquí

REUTERS

BAGDAD, 20 de Payares (Reuters/EP)

El primer ministru iraquí, Nuri al Maliki, aseguró güei que'l pautu que permite a les tropes estaounienses permanecer n'Irak hasta'l 2011 ye la meyor opción pa restablecer la soberanía del país, y que los sos críticos planteguen exixencies que nun son realistes.

Irak y EE.UU firmaron l'acuerdu'l llunes, pero pa qu'ésti seya efeutivu tien d'aprobase pol Parlamentu iraquí. Previsiblemente, la votación parlamentaria va tener llugar la próxima selmana, enantes de les vacaciones pola Pascua musulmana.

En declaraciones a la prensa, mientres nel Parlamentu se caltenía un amargu alderique sobre'l pautu, Al Maliki dixo que l'alternativa de los que s'oponen al acuerdu ye muncho peor: l'ampliación del mandatu existente de la ONU a les tropes estaounidenses, lo que-yos permite llanzar ataques y realizar detenciones ensin el consentimientu del Gobiernu iraquí.

"Dalgunos tán coreando eslóganes diciendo qu'ésti ye un pactu degradante y que llenda la voluntá de los iraquís", dixo Al Maliki. "Pero la estensión diba ser la verdadera llende a la so voluntá", aseguró.

Al Maliki espresó que'l pactu regula "les actividades y les llendes de l'autoridá" del Exércitu estaounidense. "Nun puen arrestar a naide ensin una orde d'arrestu iraquí, pero nesti momentu tán arrestando y enllenando prisiones ensin entrugar al Gobiernu iraquí", prosiguió. "¿Cuál ye meyor?", entrugóse.

Los principales grupos políticos de la coalición gobernante d'Al Maliki pesllaron files a favor del pautu, pero los partíos del clérigu chií Muqtada al Sadr y los grupos árabes sunís caltienen reserves nesti sen y afirmen que debería plantegase un referendu.